Përmbytje dhe rrëshqitje dherash në Itali, evakuohen rreth 100 persona në Toskanë

Reshjet intensive të shiut kanë goditur rajonin e Toskanës në Itali, duke shkaktuar përmbytje, dalje të lumenjve nga shtrati dhe rrëshqitje dherash. Si pasojë e motit të keq, rreth 100 persona janë evakuuar nga zonat e rrezikuara, raportojnë mediat italiane.

Sipas të përditshmes “La Repubblica”, reshjet e dendura kanë prekur veçanërisht zonat e Massa-s, Carrara-s dhe disa pjesë të bregdetit Tirren. Për shkak të situatës së krijuar, rajoni i Toskanës qëndroi nën alarmin e kuq të motit deri në mesnatën e së enjtes.

Në qytetin e Massa-s, lumi Frigido doli nga shtrati, duke rrezikuar zonat përreth. Ndërkohë, rreth 100 banorë nga fshatrat Casette dhe Forno u detyruan të largoheshin nga banesat e tyre, pasi një rrëshqitje dheu bllokoi rrugën që lidh këto zona me pjesën tjetër të territorit.

Probleme të ngjashme u raportuan edhe në provincën e Luccës, ku disa përrenj dhe lumi Serchio dolën nga shtrati, duke shkaktuar përmbytje në disa zona.

Në San Giuliano Terme, në provincën e Pisa-s, banesat që ndodhen në zonën e përmbytjeve të lumit Serchio mbetën të evakuuara. Ndërkohë, një urë në zonën e Ripafratta u mbyll për qarkullimin për shkak të rrezikut.

Moti i keq shkaktoi gjithashtu probleme në qarkullimin rrugor. Një segment rrugor në zonën e Caprigliola-s, në Massa-Carrara, u mbyll përkohësisht në të dyja drejtimet pas një rrëshqitjeje dheu gjatë natës, ndërsa trafiku u devijua në rrugë alternative.