Karabinierët e Njësisë së Operacioneve Speciale (ROS) kanë ekzekutuar mëngjesin e së enjtes gjashtë urdhër-kontrolle në provincën e Romës, me urdhër të Prokurorisë së Caltanissetta-s, në kuadër të hetimeve për masakrën e Via D’Amelio dhe zhdukjen e “Ditarit të Kuq” të gjyqtarit antimafia, Paolo Borsellino.

Sipas raportimeve të agjencisë italiane “ANSA“, kontrollet kanë përfshirë ambientet në pronësi të ish-Shefit të Policisë, Gianni De Gennaro, si dhe të informatorit të drejtësisë, Salvatore Contorno. Në listën e subjekteve të kontrolluara bëjnë pjesë gjithashtu bashkëpunëtorja e De Gennaro-s, Donatella Peruzzi, oficeri i tij i mbrojtjes personale, Massimo Carnicelli, dhe ish-inspektori i policisë, Francesco Pacetto.

Hetimi, i cili koordinohet nga prokurori Salvatore De Luca, ka në fokus zbardhjen e përgjegjësive të mundshme të ish-pjesëtarëve të strukturave institucionale që vepronin në varësi të ish-kreut të Skuadrës Fluturuese të Palermos, Arnaldo La Barbera.

Objektivi i kësaj faze hetimore është verifikimi i rolit të këtyre strukturave në pengimin e hetimeve për atentatin e Via D’Amelio, si dhe hedhja e dritës mbi zhdukjen e “Ditarit të Kuq” ku gjyqtari Borsellino mbante shënimet e tij konfidenciale.

/rtsh.al/