Sekretari i Mbrojtjes i SHBA-së, Pete Hegseth, i dha të enjten një medalje ushtarit të ushtrisë që e qortoi publikisht atë dhe ndihmësit e tij në Varrezat Kombëtare të Arlingtonit.

“Ne i duam ushtarët. Ne i duam standardet. Të lumtë, specialist”, shkroi Hegseth në platformën amerikane të mediave sociale X. “Vazhdoni përpara, patriotë.”

Një zyrtar i Pentagonit i tha CNN-së se Hegseth priti në Pentagon Regjimentin e 3-të të Këmbësorisë së SHBA-së, i njohur si “The Old Guard” (Garda e Vjetër), “ku i akordoi me krenari specialistit (Thomas) Iglesias Medaljen e Lavdërimit për Shërbimin e Përbashkët, për kryerjen e detyrave të tij pranë Varrit të Ushtarit të Panjohur, më 11 nëntor 2026”.

Anëtarët e grupit të Hegseth u dëgjuan duke qeshur të mërkurën, pasi bënë fotografi përpara varrit, pas një ceremonie të organizuar me rastin e Ditës së Veteranëve në Varrezat Kombëtare të Arlingtonit. Iglesias ndaloi patrullimin dhe u kthye përballë tyre.

“Të gjithë vizitorët duhet të ruajnë një atmosferë heshtjeje dhe respekti në çdo kohë”, u bëri thirrje ai.

Hegseth ishte së bashku me bashkëshorten e tij, shefin e kabinetit Ricky Buria, zëvendës shefin e kabinetit Patrick Weaver dhe këshilltaren e lartë Tami Radabaugh.

Zëdhënësi kryesor i Pentagonit, Sean Parnell, tha të mërkurën se ushtari “i kujtoi me të drejtë dhe në mënyrë të respektueshme të gjithëve që të ruanin sjelljen e duhur”./AA