Kombëtarja shqiptare ka dhuruar një mbrëmje feste në “Air Albania”, duke mposhtur Finlandën me rezultatin 2-0 dhe duke hedhur një hap vendimtar drejt ngjitjes në Ligën B të Nations League.
Protagonistët e mbrëmjes ishin Ernest Muçi dhe Rey Manaj, të cilët me golat e tyre vulosën suksesin e kuqezinjve. Spektakli nisi në minutën e 35-të, kur Muçi realizoi një gol të jashtëzakonshëm me të jashtmen, duke dërguar topin në rrjetë dhe duke ndezur stadiumin.
Përpara golit, Shqipëria kishte marrë iniciativën e lojës dhe kishte provuar disa herë të rrezikonte portën kundërshtare. Laçi, Asllani dhe vetë Muçi kërkuan hapësira, ndërsa Finlanda u përpoq të përgjigjej përmes goditjeve standarde.
Në njërën prej tyre, në minutën e 42-të, Etrit Berisha u shfaq vendimtar, duke realizuar një pritje të shkëlqyer ndaj goditjes me kokë të Tenho.
Me rikthimin nga pushimi, Shqipëria nuk humbi kohë për të goditur sërish. Në minutën e 50-të, Elseid Hysaj dërgoi një krosim të saktë nga krahu i djathtë dhe Rey Manaj u ngrit mbi mbrojtësit finlandezë, duke e dërguar topin me kokë në rrjetë për rezultatin 2-0.
Finlanda e pati edhe më të vështirë misionin në minutën e 67-të, kur Tenho u ndëshkua me karton të kuq pas një ndërhyrjeje të rëndë ndaj Muçit, duke e lënë skuadrën e tij me një lojtar më pak.
Në vazhdim, kuqezinjtë administruan avantazhin dhe kërkuan edhe golin e tretë, por rezultati mbeti i pandryshuar deri në përfundim.
Me këtë triumf, Shqipëria shkon në kuotën e 12 pikëve pas katër ndeshjesh dhe forcon pozitat në krye të Grupit C1. Tashmë, sfida e radhës ndaj Bjellorusisë në transfertë, në Hungari, mund të jetë vendimtare për fatin e grupit.
Një barazim do t’u mjaftonte kuqezinjve për të siguruar objektivin dhe për të prerë biletën drejt Ligës B, në një tjetër sukses të rëndësishëm për futbollin shqiptar.
