Vdekja e një 20-vjeçari në një hotel në Dubai, ngjarje që tronditi opinionin publik në Britaninë e Madhe, është bërë objekt i një procesi gjyqësor. Nëna e tij akuzohet për vrasje nga pakujdesia, pasi një pako me kokainë që i riu kishte gëlltitur u ça në stomakun e tij.
Jensen Westhead, nga Thornton-Cleveleys, Lancashire, kishte fluturuar nga aeroporti i Mançesterit drejt Emirateve të Bashkuara Arabe për të transportuar disa pako me kokainë që i kishte gëlltitur. Ai u gjet i pajetë më 5 dhjetor 2024 në dhomën e hotelit Avalon, një ditë pasi kishte mbërritur në Dubai.
Të lidhura
None found
Siç raporton Daily Mail, në Gjykatën e Kurorës në Preston janë paraqitur nëna e tij, Rebecca Hatch, 45 vjeçe, bashkëshorti i saj, Glenn Hatch, 51 vjeç, dhe tre persona të tjerë, në kuadër të çështjes për vdekjen e të riut.
Sipas prokurorisë, nëna dhe njerku e dinin çfarë po bënte 20-vjeçari dhe e ndihmuan të nisej, duke i mundësuar rinovimin e pasaportës dhe duke e çuar në aeroportin e Mançesterit.
Për të mbështetur këtë pretendim, prokuroria paraqiti mesazhet që i riu shkëmbeu me nënën gjatë udhëtimit për në Dubai. Sipas saj, ato tregojnë se Rebecca Hatch ishte në dijeni të veprimtarisë së të birit dhe të rrezikut që ai kishte marrë përsipër.
Tre të pandehurit e tjerë janë Alexander Tofton, 33 vjeç, Joseph Watson, 32 vjeç, dhe Steven Stephenson, 48 vjeç. Prokuroria pretendon se secili prej tyre kishte një rol në një rrjet ndërkombëtar të trafikimit të kokainës.
Në gjykatë u paraqit edhe gjetja e gjurmëve të gishtërinjve të Steven Stephenson në një nga pakot e drogës që u nxorën nga trupi i viktimës gjatë hetimeve pas vdekjes.
Prokuroria thotë gjithashtu se, pas vdekjes së 20-vjeçarit, janë ndërmarrë veprime për të fshirë të dhëna nga disa telefona celularë. Në shtëpinë e njërit prej të pandehurve u gjet edhe një shënim ku shprehej keqardhje dhe përgjegjësi për vdekjen e të riut.
Të pesë të pandehurit i mohojnë akuzat për vrasje nga pakujdesia dhe për përfshirje në eksportimin e një droge të klasit A. Njëri prej tyre akuzohet edhe se nuk dha kodin PIN të telefonit gjatë hetimeve.
