Kuvendi i Kosovës pritet të vijojë sot seancën plenare, ku një nga çështjet kryesore të rendit të ditës është rishqyrtimi i Ligjit për Dhomat e Specializuara dhe Zyrën e Prokurorit të Specializuar, i njohur si Ligji për Specialen.
Seanca u ndërpre një ditë më parë për shkak të mungesës së kuorumit pas pauzës. Deputetët pritet t’i rikthehen sot diskutimit për këtë çështje, e cila ka shkaktuar reagime në skenën politike dhe nga përfaqësues ndërkombëtarë.
Kjo pikë u përfshi në rendin e ditës pas kërkesës së Grupit Parlamentar të PDK-së. Ligji është kthyer për rishqyrtim nga presidentja e Kosovës, Justina Shiroka-Pula. Ndërkohë, Komisioni për Legjislacion ka bërë të ditur se për miratimin e tij në formën aktuale, pa ndryshime, nevojiten 61 vota të deputetëve.
Ushtruesja e detyrës së kryetares së PDK-së, Vlora Çitaku, u ka bërë thirrje deputetëve që ta miratojnë ligjin në formën në të cilën është kthyer nga presidentja. Sipas saj, pas këtij miratimi duhet të nisë një procedurë e re ligjore për ndryshimin e tij.
Gjatë seancës së së enjtes, Çitaku u zotua se PDK-ja do ta paraqesë nismën e re ligjore të hënën, më 16 nëntor.
Për këtë çështje ka reaguar edhe Bashkimi Evropian. Zyra e BE-së në Kosovë ka shprehur shqetësim lidhur me njoftimin për votimin e mundshëm të ligjit në Kuvend, duke ngritur pikëpyetje për zhvillimet që lidhen me Dhomat e Specializuara.
