Ministri i Financave, Petrit Malaj, ka ndjekur nga afër në Porto Romano procesin e funksionimit të sistemit të ri të plumbçeve elektronike, i cili do të aplikohet në të gjitha autocisternat që transportojnë hidrokarbure në Shqipëri.

Sistemi i ri synon të mbulojë të gjithë zinxhirin e transportit të karburanteve, nga pikat e hyrjes në territorin shqiptar deri në pikat e daljes, duke mundësuar monitorimin elektronik të lëvizjes së tyre.

Sipas ministrit Malaj, ky mekanizëm do të lehtësojë procedurat për operatorët ekonomikë që merren me transportin e hidrokarbureve, ndërsa do t’u vijë në ndihmë autoriteteve doganore në luftën kundër kontrabandës dhe evazionit.

“Po shohim nga afër procesin e sistemit të ri të plumbçeve elektronike, që do të aplikohet në të gjitha autocisternat që kryejnë transportin e hidrokarbureve, nga pikat hyrëse në Shqipëri deri në pikat dalëse.

Ky sistem lehtëson procedurat për të gjithë operatorët ekonomikë që merren me transportin e hidrokarbureve, si dhe ndihmon autoritetet doganore në luftën kundër kontrabandës së hidrokarbureve dhe në mbrojtjen e të ardhurave publike.

I gjithë sistemi i ri sjell katër avantazhe kryesore: mbrojtjen e të ardhurave publike, rritjen e eficiencës për operatorët ekonomikë, uljen e kostove operacionale për doganat dhe luftën kundër evazionit fiskal dhe kontrabandës”, tha Malaj.

Përmes këtij mekanizmi elektronik synohet të rritet kontrolli dhe gjurmueshmëria e transportit të hidrokarbureve, duke garantuar një monitorim më të mirë të lëvizjes së autocisternave në territorin shqiptar.

/rtsh.al/