Një tjetër atentat me bombë në Moskë, plagoset ish-zyrtari ukrainas që jetonte në Rusi

Një bombë e dytë në makinë ka shpërthyer në Rusi, vetëm një ditë pasi një prej kolonelëve më të lartë të forcave ajrore të Putinit u vra në një tjetër shpërthim.

Shoferi mbeti i plagosur rëndë pasi shpërthimi përfshiu automjetin tip SUV, ndërsa ai po udhëtonte në jug të Moskës.

Sergei Zavorotniy, një person që jeton në mërgim dhe ish-zëdhënës i ish-kryeministrit ukrainas pro-Putin, Mykola Azarov, dyshohet se ishte objektivi i sulmit.

Ngjarja vjen vetëm një ditë pasi një prej kolonelëve më të lartë të forcave ajrore të Putinit u vra nga shpërthimi i një bombe në makinë në Shën Petersburg.

Zavorotniy, 72 vjeç, i cili u largua drejt Rusisë në vitin 2014, gjatë protestave kundër qeverisë në Ukrainë, dhe që aktualisht njihet si një propagandist i vendosur pro-Putin, raportohet se është shtruar në spital.

Dëshmitarët raportuan për një shpërthim të fuqishëm dhe thanë se kishin parë një burrë të paidentifikuar të shtrirë pranë automjetit SUV.

Dëshmitarët thanë se kishin telefonuar ambulancën pasi konfirmuan se shoferi kishte ende puls.

“Po drejtoja makinën në drejtim të kundërt në rrugën Kirovogradskaya”, tregoi një prej tyre.

“Një Toyota po vinte drejt meje. Vura re se burri në timon kishte vendosur rripin e sigurimit, por kjo nuk e ndihmoi. Fuqia e shpërthimit e hodhi atë përmes xhamit të përparmë. Makina u drejtua drejtpërdrejt drejt meje, por ndaloi vetëm një metër larg”, deklaroi ai.