Rezidenca e re luksoze e LeBron James në Beverly Hills është drejt përfundimit, pas afro tri vitesh punime. Ylli 41-vjeçar i basketbollit amerikan vendosi në vitin 2023 të shembte vilën e vjetër të viteve 1930, të cilën e kishte blerë në vitin 2020, për të ndërtuar nga e para një kompleks rezidencial madhështor.

Projekti përfshin një banesë kryesore dykatëshe me sipërfaqe rreth 1.500 metra katrorë, një garazh nëntokësor prej afro 715 metrash katrorë, pishinë, spa dhe kuzhinë të jashtme. Prona ka gjithashtu një shtëpi të veçantë për mysafirët, me sipërfaqe rreth 608 metra katrorë, ku përfshihet edhe një kinema private në bodrum, si dhe ambiente për zhytje në ujë të nxehtë dhe të ftohtë.

Një prej elementeve të fundit që po përfundon është fusha e basketbollit, një hapësirë e domosdoshme për një prej lojtarëve më të mëdhenj në historinë e NBA-së.

Gjatë punimeve, bashkëshortja e tij Savannah dhe vajza 12-vjeçare Zhuri kanë qëndruar në pronë. Në muajin tetor, çifti i dha revistës “Vogue” një vizitë në rezidencën e re, duke prezantuar edhe disa prej pajisjeve të veçanta, mes tyre një dhomë hiperbarike të prodhuar nga OxyHealth.

Megjithatë, LeBron nuk ka pasur shumë mundësi të shijojë shtëpinë e re për shkak të angazhimeve sportive. Gjatë verës, ai u largua nga Los Angeles Lakers dhe firmosi një kontratë dyvjeçare me Philadelphia 76ers, me vlerë rreth 7.25 milionë euro. Gjatë sezonit, basketbollisti qëndron në Nju Jork dhe udhëton drejt Filadelfias me helikopter.

Kjo situatë e ka bërë më të ndërlikuar organizimin e jetës familjare. Savannah, në një intervistë më 3 nëntor në emisionin “Baby, This Is Keke Palmer”, foli për vështirësinë e menaxhimit të përditshmërisë mes Los Angelesit, Nju Jorkut dhe Filadelfias, ndërsa djali Bryce ndjek aktivitetin e tij në basketbollin universitar në Tucson.

“Çmenduria në jetën time është të gjej mënyrën se si të jem në tri vende njëkohësisht”, u shpreh ajo.

Familja James është përballur së fundmi edhe me një incident shqetësues. Më 6 nëntor, ndërsa LeBron ndodhej në Cleveland për një ndeshje me Philadelphia 76ers, një 22-vjeçar u arrestua në banesën tjetër të tij në Brentwood, nën dyshimin për përndjekje të rëndë.

Pas ngjarjes, basketbollisti u përpoq të qetësonte tifozët: “Familja ime është e sigurt dhe kjo është gjëja më e rëndësishme. Ende po përpiqemi të sqarojmë gjithçka”.

LeBron James do të festojë 42-vjetorin më 30 dhjetor, ndërsa vazhdon karrierën në NBA me synimin për të fituar titullin e pestë kampion. Ndërkohë, rezidenca e tij e re në Beverly Hills pritet të jetë një prej pronave më mbresëlënëse të zotëruara nga një yll i sportit amerikan.