Valbona Zhupa zgjidhet në Bordin e Aleancës Evropiane të Agjencive të Lajmeve
Drejtoresha e Përgjithshme e Agjencisë Telegrafike Shqiptare (ATSH), Valbona Zhupa është zgjedhur anëtare e Bordit të Aleancës Evropiane të Agjencive të Lajmeve (EANA), duke i dhënë Shqipërisë një rol të drejtpërdrejtë në strukturën drejtuese të një prej organizatave kryesore të bashkëpunimit mes agjencive të lajmeve në Evropë.
Zgjedhja u bë gjatë Asamblesë së Përgjithshme të EANA-s, të zhvilluar më 13 nëntor në Larnaka të Qipros, në një vit të veçantë për organizatën, e cila shënon 70-vjetorin e themelimit.
Përfshirja e ATSH-së në këtë strukturë vjen në një kohë kur agjencitë e lajmeve përballen me ndryshime të mëdha në industrinë mediatike, nga zhvillimi i inteligjencës artificiale dhe mbrojtja e të drejtave të autorit, deri te sfidat e besueshmërisë dhe të informimit në një mjedis ndërkombëtar gjithnjë e më kompleks.
Gjatë prezantimit të kandidaturës, Zhupa paraqiti si prioritete zgjerimin e bashkëpunimit të EANA-s me agjenci lajmesh edhe jashtë Bashkimit Evropian, krijimin e lidhjeve më të drejtpërdrejta mes redaksive, si dhe nxitjen e shkëmbimit të përvojave dhe projekteve të përbashkëta mes agjencive anëtare.
Asambleja e Përgjithshme u zhvillua pas konferencës “News Agencies and Geopolitics”, ku drejtues dhe përfaqësues të agjencive të lajmeve diskutuan mbi ndikimin e zhvillimeve gjeopolitike në punën e agjencive dhe rolin e tyre në garantimin e informacionit të besueshëm.
Në agjendën e Asamblesë ishin gjithashtu raporti vjetor i organizatës, buxheti për periudhën 2026–2027, anëtarësimet e reja dhe çështje që lidhen me të ardhmen e bashkëpunimit mes agjencive.
Për vitin 2027, Prishtina është përcaktuar si vend pritës i aktivitetit pranveror të EANA-s, ndërsa Zvicra do të presë takimin e vjeshtës.
E themeluar në vitin 1956, EANA bashkon agjenci lajmesh nga vende të ndryshme evropiane dhe shërben si një platformë për bashkëpunimin profesional, shkëmbimin e informacionit dhe mbrojtjen e interesave të përbashkëta të agjencive të lajmeve.
360grade.al
