Ndërsa Partia Socialiste mblidhet sot në Asamblenë Kombëtare në Gjirin e Lalëzit, kryetari i Bashkisë së Tiranës, Erion Veliaj, i cili ndodhet në paraburgim prej 21 muajsh, i është drejtuar anëtarëve me një letër të gjatë të dërguar në telefonat e pjesëmarrësve, pasi kërkesa e tij për pjesëmarrje u refuzua nga autoritetet. Letra titullohet “Partia Socialiste është më e madhe se kryetari i saj” dhe përmban kritika ndaj mënyrës së drejtimit të PS-së, akuza për ndërhyrje politike në rastin e tij, si dhe thirrje për më shumë demokraci të brendshme, debat dhe llogaridhënie. Veliaj kërkon aktivizimin e procedurës statutore për mocion mosbesimi ndaj kryetarit Edi Rama.
Në leximin e tij historik të përvojës brenda partisë, Veliaj përshkruan rrugëtimin e tij politik, arritjet në pushtetin vendor dhe mirënjohjen ndaj aktivistëve. Ai pranon gabime personale dhe shpreh gatishmërinë për t’u përballur me përgjegjësitë e veta, por shton se përgjegjësia individuale nuk duhet të maskojë përgjegjësinë e kryetarit për modelin e drejtimit. Veliaj argumenton se pushteti i gjatë ka dëmtuar mekanizmat e kontrollit dhe se organet kolegjiale të partisë shpesh informohen vetëm për vendime të marra më parë nga kryetari, duke humbur funksionin e tyre real.
Letra trajton marrëdhëniet e brendshme të partisë: përzgjedhjen e ministrave, rolins e Grupit Parlamentar, kriteret për kandidatët dhe peshën e strukturave partiake. Ai paralajmëron se mungesa e debatit dhe frika kanë zëvendësuar mëparshmen frymë debatimi, solidariteti dhe meritokraci. Veliaj denoncon ndërhyrje në pushtetin vendor, duke përmendur ndryshimet në administratën e Vlorës dhe Tiranës, si dhe një përpjekje për shkarkimin e tij që, sipas tij, u shfuqizua nga Gjykata Kushtetuese me vendimin nr.66, datë 3 nëntor 2025.
Ai pretendon gjithashtu se ndaj tij janë ushtruar presione politike, përfshirë kërcënime për rëndim të pozitës penale dhe pengim të kujdesit mjekësor, pretendime që i ka kërkuar Grupit Parlamentar të shqyrtojë, duke propozuar edhe ngritjen e një komisioni hetimor parlamentar. Veliaj kërkon që Asambleja të shqyrtojë formalisht përgjegjësinë politike të kryetarit të partisë dhe të aktivizojë procedurat statutore, me debat të hapur, respekt për mendimin ndryshe dhe mundësi të barabarta për anëtarët. Ai përmbyll duke theksuar nevojën për ndryshim të modelit të drejtimit dhe rolin e institucioneve partiake.