Një 96-vjeçare nga Ohio e Shteteve të Bashkuara ka realizuar ëndrrën e saj, duke vizituar të shtatë kontinentet e botës së bashku me nipin e saj.
Joy Ryan, e njohur si “Grandma Joy”, përfundoi aventurën me nipin 45-vjeçar, Brad Ryan, pas udhëtimeve në Tajlandë dhe Australi gjatë shtatorit.
Australia ishte kontinenti i fundit që vizituan, ku Joy pati mundësinë të shihte nga afër koalat dhe të vegjlit e tyre.
Ajo u shpreh krenare që kishte arritur ta përmbushte këtë qëllim.
Historia e tyre nisi në vitin 2015, pas dhjetë vitesh larg njëri-tjetrit, kur Brad e ftoi gjyshen për kamping në malet Great Smoky Mountains, duke e ditur se ajo nuk kishte parë kurrë male.
Që nga ajo kohë, ata vizituan të 63 parqet kombëtare të SHBA-së, duke e përfunduar këtë aventurë në maj të vitit 2023.
Në moshën 91-vjeçare, Joy mori pasaportën e parë dhe nisi udhëtimet ndërkombëtare.
Së bashku me nipin, ajo vizitoi Kenian, Irlandën, Tajlandën dhe destinacione të tjera.
Për Bradin, këto udhëtime kanë qenë më shumë sesa eksplorim i botës.
Ato e kanë ndihmuar të rindërtojë marrëdhënien me gjyshen dhe të lërë pas përvojat e vështira të së kaluarës.
Historia e tyre tregon se nuk është kurrë vonë për të realizuar ëndrrat dhe për të forcuar lidhjet familjare. /Telegrafi/
