Nënkryetari i Lidhjes Demokratike të Kosovës, Lutfi Haziri, ka reaguar lidhur me debatin për rolin e ish-presidentit Ibrahim Rugova në zhvillimet politike të Kosovës gjatë dhe pas viteve ’90.
Haziri ka thënë se ndikimi politik i Rugovës ka qenë vendimtar në realizimin e ëndrrës për pavarësinë e Kosovës, e cila u shpall më 17 shkurt 2008.
Në një postim në Facebook, ai ka theksuar se Republika e Kosovës e mban autorësinë e Rugovës, duke përmendur edhe kontributin e figurave të tjera në rezistencën dhe luftën çlirimtare.
“Deshi apo s’deshi dikush, Republika e mban autorësinë e tij”, ka shkruar Haziri.
Ai ka përmendur Adem Jasharin, Adem Demaçin, Bujar Bukoshin dhe Ahmet Krasniqin, duke thënë se rezistenca, lufta dhe krijimi i Republikës ishin procese në të cilat shqiptarët kontribuuan së bashku.
“Pra, rezistencën e bëmë bashkë, luftën e bëmë bashkë, dhe ajo më madhështorja, Republikën e bëmë bashkë nën udhëheqjen e liderit, i cili ishte një hap para të gjithëve”, ka shkruar ai.
Haziri ka bërë thirrje për më shumë bashkim, pavarësisht dallimeve politike.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2026 Gazeta Online Insajderi - Të gjitha të drejtat e rezervuara.
