“Bomba” e Majkos në Asamble: Ka 1 mijë orë video erotike dhe korruptive, jepni dorëheqjen para se të dalin

Një deklaratë e fortë mësohet të jetë bërë nga ish-kryeministri Pandeli Majko gjatë mbledhjes me dyer të mbyllura të Asamblesë Kombëtare të Partisë Socialiste.

Sipas informacioneve të raportuara nga burime brenda PS-së, Majko ka folur për ekzistencën e rreth 1 mijë orëve filmime, në të cilat, sipas pretendimeve të tij, shfaqen eksponentë socialistë në materiale me përmbajtje erotike dhe korruptive.

“Kam informacion se në 1 mijë orë filmime ka eksponentë të PS-së në video erotike dhe korruptive. Mirë është të jepni dorëheqjen para se të dalin. Mos e vini në siklet partinë dhe kolegët”, mësohet të ketë deklaruar Majko.

Ish-kryeministri, sipas këtyre burimeve, u ka bërë thirrje personave që mund të jenë të përfshirë në materialet e pretenduara të largohen nga funksionet e tyre përpara se pamjet të bëhen publike.

Deri më tani nuk ka një konfirmim zyrtar për ekzistencën, përmbajtjen apo autenticitetin e filmimeve të përmendura. Po ashtu, nuk janë bërë publikë emra konkretë të personave që pretendohet se shfaqen në këto materiale.