42 kilometra për 2 orë, 35 minuta e 35 sekonda, Luiza Gega triumfon në Maratonën e Tiranës

Luiza Gega është shpallur fituese e garës së maratonës për femra, në distancën prej 42 kilometrash, në edicionin e dhjetë të Maratonës së Tiranës.

Atletja shqiptare e përfundoi garën me kohën 2 orë, 35 minuta e 35 sekonda, duke siguruar vendin e parë dhe çmimin prej 5 mijë eurosh.

Ky edicion i Maratonës së Tiranës ka mbledhur rreth 5,800 pjesëmarrës. Risia e këtij viti ishte përfshirja e garës prej 5 kilometrash, me synimin për të nxitur pjesëmarrjen e më shumë qytetarëve.

Për mbarëvajtjen e aktivitetit janë angazhuar rreth 600 vullnetarë, 800 punonjës policie dhe 500 punonjës të Bashkisë së Tiranës, ndërsa përgatitjet për organizimin kanë zgjatur rreth gjashtë muaj.

Maratona nisi në orën 08:00, ndërsa për shkak të zhvillimit të garës, një pjesë e akseve kryesore të kryeqytetit do të qëndrojnë të bllokuara deri në orën 16:00.

Mes rrugëve të prekura nga kufizimet janë Unaza e Vogël, bulevardi “Zogu i Parë”, Bulevardi i Ri, segmenti nga sheshi “Skënderbej” deri te sheshi “Nënë Tereza”, Rruga e Kavajës, Rruga e Durrësit, “Myslym Shyri” dhe disa akse në zonën e ish-Bllokut.