Sanksionet ndaj Rusisë, forcat e armatosura evropiane bastisin anijen e flotës-hije

Forca të armatosura evropiane hipën në bordin e një anijeje-cisternë në ujërat detit Mesdhe, që dyshohej se i përkiste asaj që njihet si flota-hije e Rusisë.

Lajmin e ka bërë të ditur ditën e diel Përfaqësuesja e Lartë e BE-së, Kaja Kallas, sipas të cilës sekuestrimi i anijes u bë më herët gjatë javës.

Trupat, pjesë e misionit IRINI të Bashkimit Evropian, hipën në anijen-cisternë që po lundronte në ujërat mesdhetare me flamur të rremë.

“BE do të vazhdojë të prishtë operacionet e flotës-hije të Rusisë në det dhe përmes mjeteve diplomatike”, deklaroi Kallas në rrjetin “X”, ku paralajmëroi miratimin e sanksioneve të reja ndaj Moskës, që do të godasin bankat, blerësit dhe kompanitë që mbështesin flotën hije.

Rusia e përdor flotën në fjalë për të shmangur sanksionet e Perëndimit ndaj industrisë së saj të naftës. Kjo bëhet duke përdorur struktura komplekse pronësie, flamuj të rremë dhe taktika të tjera të projektuara për të kamufluar origjinën e ngarkesës.

Në gusht, forcat e misionit IRINI kryen një operacion verifikimi duke hipur në anijen “MV Sun”. Një aksion i ngjashëm u verifikua edhe më herët gjatë muajit ndaj një anijeje tjetër.

Misioni IRINI nisi në mars të 2020-s. Mandati fillestar i tij parashikonte parandalimin e trafikut të armëve, mbledhjen e informacionit mbi kontrabandën e naftës, bllokimin e zinxhirëve të trafikut të qënieve njerëzore, etj.

Në tetor, mandati i operacionit u zgjat deri më 31 mars 2029, me qëllim mbrojtjen e interesave evropiane në Mesdhe dhe vijimin e misioneve të paqes dhe stabilitetit në Libi.