Një grua që pretendon se është përdhunuar nga aktori dhe komediani britanik Russell Brand kur ishte 16 vjeçe, ka vendosur të dalë publikisht me identitetin e saj dhe të nisë një fushatë për ndryshimin e ligjit mbi moshën e lejuar për marrëdhënie seksuale.

Mia Latter, sot 37 vjeçe, ishte një nga gjashtë gratë që në vitin 2023 ngritën akuza ndaj Brandit në kuadër të një investigimi të publikuar nga gazeta “The Times”, “The Sunday Times” dhe emisioni investigativ “Dispatches” i Channel 4. Në atë kohë, ajo u identifikua me pseudonimin “Alice”. Russell Brand i mohoi akuzat.

Latter kërkon që në Britaninë e Madhe të vendoset një sistem i shkallëzuar i moshës së pëlqimit, i cili do të ndalonte ligjërisht marrëdhëniet seksuale mes personave 16 dhe 17 vjeç/e dhe të rriturve më të mëdhenj në moshë.

Duke folur për “The Sunday Times”, ajo tregoi se ishte 16 vjeçe kur takoi Russell Brand, i cili në atë kohë ishte 30 vjeç dhe punonte për televizionin MTV. Sipas saj, takimi ndodhi teksa po kthehej në shtëpi nga një shëtitje për të bërë pazar.

“Besoj se njerëzit u tronditën aq shumë nga historia ime për shkak të diferencës së madhe në moshë dhe pabarazisë së dukshme të pushtetit mes nesh”, u shpreh ajo.

Latter pretendon se Brand i kishte kërkuar ta mbante të fshehtë lidhjen nga shoqet e shkollës, ndërsa, sipas saj, në praninë e njerëzve të tjerë të stafit dhe rrethit të tij shoqëror, ai i referohej asaj si “fëmija”.

Ajo pretendon se përdhunimi oral ka ndodhur drejt fundit të marrëdhënies së tyre. “The Sunday Times” raporton se në vitin 2023 Latter e kishte përshkruar fillimisht këtë episod si sulm seksual, por tashmë e cilëson atë si përdhunim.

Fushata e saj synon të vendosë kufizime ligjore për marrëdhëniet mes adoleshentëve 16-17 vjeç/e dhe personave në moshë të rritur, veçanërisht atyre që janë në të tridhjetat, të dyzetat apo të pesëdhjetat.

“Nuk dua që adoleshentët të trajtohen si kriminelë pse kryejnë marrëdhënie me njëri-tjetrin. Nëse je nga 16 deri në 18 vjeç, është e arsyeshme të kesh një marrëdhënie me dikë të së njëjtës grupmoshë, dhe adoleshentët do ta bëjnë gjithsesi këtë. Por nëse je në të tridhjetat, të dyzetat apo të pesëdhjetat dhe kërkon të kesh një marrëdhënie me dikë nën 18 vjeç, kjo duhet të jetë vepër penale”, deklaroi ajo.

Propozimi ka marrë edhe reagime nga përfaqësues të qeverisë britanike. Ministrja e Zyrës së Kabinetit, Louise Haigh, e cilësoi ndryshimin e ligjit si një hap shumë të madh, por theksoi se çështja meriton të shqyrtohet me seriozitet.

Ajo dënoi gjithashtu kulturën që, sipas saj, ekzistonte në vitet 2000, kur marrëdhëniet e personazheve të famshëm me adoleshentet normalizoheshin dhe madje paraqiteshin si diçka për t’u admiruar.

Ndërkohë, Russell Brand është dënuar së fundmi me 10 vite e gjashtë muaj burg për një akuzë përdhunimi dhe tri akuza për sulm seksual. Ai u shpall i pafajshëm për dy akuza të tjera përdhunimi dhe një akuzë për tentativë sulmi të pahijshëm. Gjashtë gratë që kishin bërë denoncimet publike në vitin 2023 nuk ishin pjesë e procesit të tij të fundit gjyqësor.

Latter ka bërë të ditur se nuk do të vijojë më procedurat penale lidhur me pretendimet e saj, në mënyrë që të përqendrohet te fushata për ndryshimin e ligjit. Sipas saj, Prokuroria nuk e përfshiu në procesin gjyqësor ndaj Brandit, ndërsa policia kishte shprehur dëshirën që ajo të ishte pjesë e një gjyqi të mëvonshëm.

Policia Metropolitane bëri të ditur se kishte nisur një hetim në janar të vitit 2026, pas marrjes së një denoncimi për përdhunim. Hetuesit kishin kërkuar këshillën e Shërbimit të Prokurorisë së Kurorës (CPS), i cili kishte kërkuar mbledhjen e informacioneve të tjera përpara se të merrej një vendim për ngritjen e akuzave.

Policia konfirmoi se hetimi vijon, duke pranuar se vonesat kanë qenë shqetësuese për denoncuesen, por duke theksuar se synimi është paraqitja e provave sa më të plota. Edhe CPS deklaroi se do të vijojë bashkëpunimin me hetuesit për të siguruar që çështja të ecë përpara sa më shpejt të jetë e mundur.