Një fluks rekord emigrantësh ka përfshirë Ishujt Kanarie në Spanjë, ku vetëm gjatë së shtunës, 14 nëntor, mbërritën 1,488 persona me gomone dhe varka druri. Pjesa më e madhe e tyre, 1,235 persona, udhëtuan me 12 varka të mëdha prej druri drejt ishullit El Hierro, ndërsa 203 të tjerë u kapën në një mjet lundrues pranë Gran Canarias dhe 50 persona mbërritën në Tenerife.
Shifra përbën një rekord të ri për një ditë të vetme në Ishujt Kanarie, duke tejkaluar rekordin e mëparshëm të 7 nëntorit 2020, kur në 33 varka të vogla dhe kanoe të mëdha mbërritën 1,461 persona. Sipas të dhënave paraprake, mes emigrantëve të mbërritur të shtunën kishte 108 gra dhe 167 të mitur.
Fluksi mund të jetë edhe më i lartë, pasi shifra nuk përfshin dy operacione shpëtimi që vijonin ende dhe 122 personat që mbërritën në El Hierro pak para mesnatës së të premtes. Në total, gjatë dy ditëve, në Ishujt Kanarie kanë mbërritur 2,331 persona me 22 mjete lundruese.
Operacionet e shpëtimit përfshinë gjashtë anije të Shërbimit të Shpëtimit Detar dhe dy mjete patrullimi të Gardës Civile spanjolle.
Situata në El Hierro po bëhet gjithnjë e më e vështirë. Sipas të dhënave të raportuara, në Qendrën e Përkohshme të Pritjes së të Huajve ndodheshin 317 persona, pa përfshirë mbërritjet e fundit. Ndërkohë, 158 persona ishin transferuar drejt Tenerifes me tragetin e linjës, ndërsa 11 emigrantë të mbërritur më herët vijonin të ishin të shtruar në spital.
Presidenti i Ishujve Kanarie, Fernando Clavijo, deklaroi se mbërritjet e vazhdueshme gjatë këtij muaji kanë tejkaluar plotësisht kapacitetet e ishullit. Këshilli i El Hierros kishte shpallur më herët emergjencë sociale, pasi brenda pesë javësh në ishull kishin mbërritur mbi 8 mijë persona.
Clavijo i ka dërguar një letër komisionerit europian për Migracionin, Magnus Brunner, ku kërkon ndërhyrje urgjente përballë rritjes së fluksit në rrugën e Atlantikut. Ai bëri të ditur gjithashtu se kryeministri spanjoll, Pedro Sánchez, është zotuar të thërrasë me urgjencë një komision ndërministror për migracionin.
Ndërkohë, ministri për Politikat Territoriale, Ángel Víctor Torres, pritet të vizitojë të dielën portin e La Restingës, ku mbërrijnë shumë prej varkave me emigrantë.
Sipas Ministrisë së Brendshme spanjolle, gjatë muajit tetor në Ishujt Kanarie mbërritën 6,194 persona, duke shënuar muajin me presionin më të madh migrator në këtë rrugë që prej vitit 2023.
Parashikimet nuk tregojnë një ulje të fluksit përpara dhjetorit, kur ndryshojnë kushtet atmosferike përgjatë rrugës detare prej më shumë se 1,000 kilometrash që lidh ishujt me Senegalin, Gambian dhe Mauritaninë.
Autoritetet e Ishujve Kanarie ia atribuojnë rritjen e nisjeve edhe dobësimit të kontrollit nga forcat e sigurisë në Senegal, të cilat janë angazhuar për organizimin e aktiviteteve sportive në Dakar.
Për Thimbo Samb, një shtetas senegalez që jeton prej 20 vitesh në Spanjë dhe protagonisti i dokumentarit “Los cayucos de Kayar”, kriza lidhet edhe me mungesën e shpresës, korrupsionin dhe pamundësinë për të gjetur punë në vendin e origjinës. Ai e lidh shtimin e emigracionit edhe me dobësimin e ndikimit politik të Ousmane Sonkos, pas largimit të tij nga qeveria nga presidenti Bassirou Diomaye Faye.
Samb, i cili mbërriti në Spanjë në moshën 17-vjeçare pas katër përpjekjesh, argumenton se duhet të krijohen rrugë më të sigurta dhe të ligjshme për emigrimin nga Afrika drejt Europës.
Ndërkohë, ish-këshilltari i qeverisë së Ishujve Kanarie për çështjet e migracionit, Txema Santana, thekson se pakënaqësia e banorëve të El Hierros nuk drejtohet ndaj emigrantëve, por ndaj reagimit të ngadaltë të autoriteteve. Ai kërkon forcimin e shërbimeve dhe transferimin sa më të shpejtë të personave që mbërrijnë, për të shmangur mbingarkimin dhe kolapsin e strukturave pritëse.
Klikoni Videon
