Ndeshja e parë pas vdekjes së Jesus de Miguel, Tenerife bën homazhe dhe mban 1 minutë heshtje në nder të tij

Klubi spanjoll i futbollit Tenerife të dielën i bëri homazh Jesus de Miguel në ndeshjen e parë që nga vdekja tronditëse e sulmuesit. Mesfushorin Nacho Gil mbajti lart fanellën e De Miguel pasi shënoi golin e parë të ekipit të tij pak para përfundimit të pjesës së parë.

Përpara ndeshjes së divizionit të dytë, lojtarët nga Tenerife dhe Ceuta mbanin veshur fanella me mbishkrimin “Gjithmonë në kujtesën tonë”. Ata u mblodhën në mesfushë për një moment heshtjeje. Të gjitha fanellat kishin emrin e De Miguel dhe numrin e tij 9 në shpinë.

Loja u ndal në minutën e nëntë, duke shënuar numrin e fanellës së De Miguel. Lojtarët, trajnerët dhe tifozët duartrokitën. Gil u duk i emocionuar kur iu dha fanella e De Miguel pasi shënoi në minutën e 40-të. Neal Viereck vulosi fitoren 2-0 të Tenerife-s ndaj Ceuta-s, fitorja e parë në ligë që nga shtatori.

Një mural i De Miguel ishte pikturuar jashtë Portës 9 në stadiumin Heliodoro Rodriguez Lopez të Tenerife-s, ku tifozët kishin lënë lule, shalle dhe qirinj pas vdekjes së tij.

De Miguel vdiq më 3 nëntor. Ai po ndiqte një top të lartë në mesfushë kur u godit në gjoks nga portieri i Andorrës, Jesus Owono, i cili doli me vrap shumë larg zonës së tij drejt fundit të ndeshjes së 2 nëntorit në Tenerife. 30-vjeçari De Miguel pësoi arrest kardiak pas përplasjes.

Owono u pezullua të premten për 12 ndeshje pasi mori karton të kuq për përplasjen në fushë me De Miguel. Komiteti disiplinor i federatës spanjolle të futbollit tha se Owono përdori “forcë të tepruar” në përplasje.

Policia spanjolle hapi një hetim për vrasje të mundshme të pavullnetshme. Sipas ligjit spanjoll, vdekjet nga shkaqe jo natyrale, përfshirë aksidentet, i nënshtrohen hetimit gjyqësor, megjithëse prokurorët kanë thënë se procedurat penale ishin të pamundura.

Trajneri i Andorrës, Carles Manso, tha të enjten se do të varet nga Owono të vendosë se kur ndihet gati të luajë përsëri.