Një debat i ashpër publik ka shpërthyer mes publicistit Veton Surroi dhe analistit Baton Haxhiu, pas publikimit të dy librave të këtij të fundit në Tiranë nga shtëpia botuese UET Press.

Përplasja nisi pas një rrëfimi të Haxhiut në librin “Kosova, historia që zhbëri Jugosllavinë”, ku ai përshkruan një drekë në vitin 1998 në banesën e nënës së Surroit, Nahire. Sipas tij, në murin e banesës ndodhej një fotografi e madhe e ish-liderit jugosllav Josip Broz Tito, për të cilën kishte zhvilluar edhe një bisedë me të zonjën e shtëpisë.

Surroi reagoi duke i cilësuar këto pretendime si të pavërteta. Ai mohoi se e kishte ftuar ndonjëherë Haxhiun në banesën e nënës së tij dhe e konsideroi rrëfimin për fotografinë e Titos si të trilluar.

Në reagimin e tij, publicisti ngriti gjithashtu akuza lidhur me të kaluarën e babait të Haxhiut, Fazli Haxhiu, si dhe pretendoi se analisti kishte pasur bashkëpunim me struktura të Shërbimit të Sigurimit Shtetëror të Serbisë gjatë vitit 1998. Surroi përmendi edhe refuzimin e dhënies së shtetësisë shqiptare për Haxhiun nga Ministria e Brendshme në vitin 2005, duke pretenduar se vendimi ishte kapërcyer më pas përmes ndërhyrjes presidenciale.

Përgjigjja e Baton Haxhiut nuk vonoi. Ai këmbënguli se dreka në banesën e familjes Surroi ka ndodhur dhe se Veton Surroi ka qenë vetë i pranishëm. Haxhiu deklaroi se nuk ka ndërmend të ndryshojë asnjë pjesë të rrëfimit të tij në libër, duke theksuar se fotografia e Titos ishte në mur dhe biseda me Nahire Surroin kishte ndodhur pikërisht siç e ka përshkruar.

Analisti kundërshtoi edhe akuzat për lidhje me strukturat serbe, ndërsa paralajmëroi se çështjen e pretendimeve ndaj babait të tij të ndjerë do ta ndjekë në rrugë ligjore.

“Për këtë, Veton, do të shihemi në gjyq”, shkroi Haxhiu, duke shtuar se për të kaluarën e babait të tij ekzistojnë dokumente dhe dëshmi që, sipas tij, mund të hedhin dritë mbi akuzat.

Në reagimin e gjatë, Haxhiu vuri gjithashtu në pikëpyetje qëndrimin e Surroit ndaj historisë së gazetës “Koha Ditore”, duke argumentuar se akuzat ndaj tij për bashkëpunim me struktura serbe prekin edhe institucionin mediatik që Surroi ka themeluar dhe që në atë periudhë drejtohej nga Haxhiu si kryeredaktor.

Ai mohoi kategorikisht se ka takuar struktura serbe në vitin 1998 dhe i kujtoi Surroit takimin e tij të pretenduar me Sllobodan Millosheviçin në të njëjtën periudhë.

Në fund, të dy protagonistët kanë mbrojtur versionet e tyre për ngjarjet e së kaluarës, ndërsa përplasja tashmë është zhvendosur përtej debatit mbi librin, duke përfshirë akuza për të kaluarën familjare, politike dhe profesionale. Haxhiu ka lënë të kuptohet se përballja e radhës me Surroin mund të zhvillohet në gjykatë.