Meta përballet me gjobën prej 805 milionë eurosh, në shënjestër fotografitë private të përdoruesve

Sipas autoritetit italian, gjoba përfaqëson rreth 0.47% të xhiros globale të grupit dhe lidhet me mënyrën se si funksiononte një veçori e Facebook-ut, e prezantuar në vitin 2023, me emrin “Merr sugjerime nga galeria kur shfleton Facebook-un”. Ky funksion u ofronte përdoruesve mundësinë të merrnin sugjerime për publikime bazuar në fotografitë dhe videot e ruajtura në memorien e telefonit.

Megjithatë, hetimi zbuloi probleme serioze në mënyrën se si kërkohej autorizimi për aksesin në galerinë e pajisjes. Sipas autoritetit, aplikacioni kërkonte një leje të vetme për të gjithë funksionet, duke përdorur një njoftim të përgjithshëm që nuk shpjegonte qartë se për çfarë do të përdoreshin të dhënat personale.

Për më tepër, opsioni rezultonte i aktivizuar paraprakisht, duke i dhënë potencialisht aplikacionit mundësinë të lexonte vazhdimisht të gjithë arkivin fotografik të përdoruesit, pa një kontroll të qartë nga ana e tij.

Hetimi nisi në korrik të vitit 2025, pas një ankese të paraqitur nga Qendra për Mbrojtjen e Konsumatorëve në Bolzano. Autoriteti italian arriti në përfundimin se kjo praktikë shkel nenin 122 të Kodit të Privatësisë, i cili mbron të dhënat e ruajtura në pajisjet elektronike dhe kërkon marrjen e një pëlqimi të lirë, specifik dhe të informuar.

Meta ka kundërshtuar përfundimet e hetimit. Një zëdhënës i kompanisë deklaroi se ajo nuk pajtohet me vlerësimin e fakteve dhe zbatimin e legjislacionit, duke e cilësuar gjobën joproporcionale. Sipas kompanisë, bëhet fjalë për një funksion ndihmës për publikimin e përmbajtjeve, i cili mund të aktivizohet vetëm pas dhënies së autorizimit në pajisje dhe mund të ndryshohet në çdo kohë nga cilësimet.

Në përcaktimin e masës së gjobës, autoriteti mori parasysh numrin e madh të përdoruesve të prekur, rreth 20 milionë persona që përdorin Android në Itali, kohëzgjatjen e shkeljes, një vendim të mëparshëm të vitit 2019, si dhe bashkëpunimin e kufizuar të kompanisë gjatë hetimit.

Autoriteti sqaroi se procedura nuk kishte të bënte me përdorimin e fotografive për trajnimin e inteligjencës artificiale, një praktikë që Meta e ka mohuar. Megjithatë, ai rezervoi të drejtën për të kryer verifikime të veçanta lidhur me funksionin e ri të përpunimit në cloud, të lançuar nga kompania në vitin 2026.

Sipas vendimit, Meta duhet që brenda 60 ditëve ta mbajë funksionin të çaktivizuar si parazgjedhje, edhe për përdoruesit që e kishin autorizuar më parë, si dhe të vendosë një kërkesë të veçantë dhe transparente për marrjen e pëlqimit. Pas këtij afati, funksioni duhet të bllokohet për të gjithë ata që nuk kanë dhënë një autorizim të vlefshëm.

Kompania ka gjithashtu 30 ditë kohë për të njoftuar masat që ka ndërmarrë dhe 90 ditë për të raportuar zbatimin e tyre.

Top Channel