Një gjobë prej 805 milionë eurosh i është vendosur Metës nga Autoriteti Italian për Mbrojtjen e të Dhënave Personale, për shkelje të rregullave mbi privatësinë. Çështja lidhet me dyshimet se Facebook-u në pajisjet Android ka hyrë në fotografitë, videot dhe të dhënat shoqëruese të tyre në telefonat e përdoruesve italianë, pa siguruar miratimin e tyre të qartë dhe të informuar.
Në qendër të vendimit është veçoria “Merr sugjerime nga galeria kur shfleton Facebook-un”, të cilën platforma e prezantoi në vitin 2023. Përmes saj, përdoruesve u propozoheshin publikime duke u mbështetur te fotografitë dhe videot që mbanin në memorien e telefonit. Autoriteti italian bëri të ditur se masa financiare përkon me rreth 0.47% të xhiros globale të grupit.
Të lidhura
None found
Procedura hetimore u hap në korrik të vitit 2025, pas ankesës së Qendrës për Mbrojtjen e Konsumatorëve në Bolzano. Në përfundim të shqyrtimit, autoriteti konstatoi shkelje të nenit 122 të Kodit të Privatësisë. Kjo dispozitë garanton mbrojtjen e të dhënave të depozituara në pajisjet elektronike dhe kushtëzon përdorimin e tyre me një pëlqim të dhënë lirisht, në mënyrë specifike dhe të informuar.
Sipas gjetjeve të hetimit, mangësitë kryesore kishin të bënin me procedurën e marrjes së lejes për hyrjen në galerinë e telefonit. Në vend që të kërkonte autorizime të veçanta, aplikacioni përdorte një miratim të vetëm për të gjitha funksionet. Njoftimi që i paraqitej përdoruesit ishte i përgjithshëm dhe nuk sqaronte mjaftueshëm qëllimet e përdorimit të të dhënave personale.
Gjithashtu, veçoria ishte e ndezur si parazgjedhje. Sipas autoritetit, kjo mund t’i krijonte aplikacionit mundësinë të lexonte në vazhdimësi të gjithë koleksionin fotografik, ndërkohë që përdoruesi nuk kishte kontroll të qartë mbi këtë akses.
Për llogaritjen e gjobës u vlerësua shtrirja e praktikës te rreth 20 milionë përdorues të Android-it në Itali. Në masën përfundimtare ndikuan edhe periudha gjatë së cilës kishte vazhduar shkelja, një vendim i mëhershëm i vitit 2019 dhe niveli i kufizuar i bashkëpunimit të Metës me hetimin.
Kompania, nga ana e saj, i ka kundërshtuar konkluzionet. Një zëdhënës tha se Meta nuk ndan të njëjtin qëndrim për vlerësimin e fakteve dhe mënyrën e zbatimit të ligjit, ndërsa e konsideron gjobën joproporcionale. Në shpjegimin e kompanisë, veçoria shërben për të ndihmuar publikimin e përmbajtjeve, aktivizohet vetëm pasi jepet leja në pajisje dhe mund të ndryshohet kurdoherë përmes cilësimeve.
Vendimi e detyron Metën që, brenda 60 ditëve, ta mbajë këtë funksion të fikur si parazgjedhje, duke përfshirë edhe llogaritë që e kishin miratuar më herët. Po brenda këtij afati, kompania duhet të paraqesë një kërkesë më vete, të qartë dhe transparente, për marrjen e pëlqimit. Kur afati të përfundojë, përdorimi i funksionit duhet të pengohet për këdo që nuk ka dhënë autorizim të vlefshëm.
Përveç këtyre detyrimeve, Meta duhet të njoftojë brenda 30 ditëve masat e ndërmarra dhe të dorëzojë brenda 90 ditëve raportimin për zbatimin e tyre.
Autoriteti theksoi se kjo procedurë nuk shqyrtonte përdorimin e fotografive për trajnimin e inteligjencës artificiale, praktikë të cilën Meta e ka mohuar. Megjithatë, institucioni la të hapur mundësinë e kontrolleve të veçanta për veçorinë e re të përpunimit në cloud, të hedhur në përdorim nga kompania në vitin 2026.
