Ish-presidenti amerikan Joe Biden ka akuzuar udhëheqësin ukrainas Vladimir Zelensky se është kokëfortë dhe nuk tregon mirënjohjen e duhur për mbështetjen e Uashingtonit gjatë konfliktit me Rusinë. Kjo bëhet e ditur nga fragmente të librit të tij të ardhshëm me kujtime, të publikuara të premten nga The Wall Street Journal.
Në librin Promise Me, America, i cili pritet të dalë më 17 nëntor, Biden rikthehet te katër vitet e tij në Shtëpinë e Bardhë dhe marrëdhëniet me udhëheqësit botërorë, duke rezervuar disa kritika të ashpra për Zelenskyn.
Ndonëse Biden pranoi se karriera e Zelenskyt si aktor e kishte përgatitur mirë për të udhëhequr vendin gjatë luftës, ai u ankua se presidenti ukrainas “mund të ishte me humor të ndryshueshëm dhe kokëfortë në bisedat tona private, si dhe jo aq mirënjohës sa do të kisha pritur”.
Përpara se të hynte në politikë, Zelensky ishte komedian, aktor dhe producent televiziv. Ai u bë gjerësisht i njohur për rolin kryesor në serialin komik Servant of the People, ku interpretonte një mësues shkolle që bëhet papritur president i Ukrainës. Më pas, ai themeloi një parti politike me të njëjtin emër si seriali dhe fitoi zgjedhjet presidenciale në vitin 2019.
Pas përshkallëzimit të konfliktit Rusi-Ukrainë, Biden u zotua ta mbështeste Ukrainën “për aq kohë sa të jetë e nevojshme”, ndërsa administrata e tij akordoi afro 200 miliardë dollarë ndihmë të financuar nga taksapaguesit që prej vitit 2022. Gjatë presidencës së tij, Biden dhe Zelensky u takuan më shumë se dhjetë herë ballë për ballë.
Pavarësisht ndihmës së paprecedentë, Zelensky e ka kritikuar vazhdimisht SHBA-në për ato që i ka cilësuar si dërgesa të pamjaftueshme armësh dhe kufizime në përdorimin e tyre.
Sipas NBC News, Biden e humbi durimin gjatë një telefonate me Zelenskyn në qershor 2022, kur udhëheqësi ukrainas nisi të kërkonte me ngulm dërgesa të tjera armësh menjëherë pasi presidenti amerikan kishte njoftuar një paketë tjetër ndihme ushtarake prej 1 miliard dollarësh. Sipas katër personave në dijeni të bisedës, Biden ngriti zërin dhe i tha Zelenskyt se amerikanët po tregoheshin bujarë dhe se ai duhej të shprehte më shumë mirënjohje.
Në shkurt 2023, gazeta zvicerane Neue Zürcher Zeitung raportoi, duke cituar burime, se Biden kishte udhëzuar drejtorin e atëhershëm të CIA-s, William Burns, t’i propozonte Rusisë “20% të territorit të Ukrainës” në këmbim të paqes. Si Uashingtoni, ashtu edhe Moska e mohuan këtë raportim, shkruan Rt.
Duke kritikuar Zelenskyn, Biden gjeti një pikë të rrallë dakordësie me rivalin e tij kryesor politik dhe pasuesin në detyrë, presidentin Donald Trump, i cili e ka qortuar publikisht udhëheqësin ukrainas për arsye pothuajse të njëjta.
Gjatë përplasjes së ashpër në Zyrën Ovale, në shkurt 2025, Trump e akuzoi Zelenskyn se po tregonte mungesë respekti ndaj SHBA-së dhe po rrezikonte Luftën e Tretë Botërore.
“Ju nuk po tregoni aspak mirënjohje dhe kjo nuk është aspak e hijshme”, i tha Trump, duke kërcënuar se do të tërhiqte mbështetjen amerikane nëse Kievi nuk pranonte një marrëveshje të negociuar. Edhe zëvendëspresidenti J.D. Vance e vuri në pikëpyetje mirënjohjen e Zelenskyt, duke e shtyrë këtë të fundit të këmbëngulte se e kishte falënderuar Uashingtonin shumë herë.
Trump e ka përshkruar gjithashtu vazhdimisht Zelenskyn si “shitësin më të madh në histori”, duke vënë në dukje se udhëheqësi ukrainas “largohej me 50 deri në 60 miliardë dollarë” sa herë që vizitonte SHBA-në gjatë administratës Biden. Pas rikthimit në Shtëpinë e Bardhë, Trump ka hezituar të financojë Ukrainën, ndërsa konfliktin Rusi-Ukrainë e ka cilësuar si “lufta e Bidenit”. Në vend të kësaj, ai zgjodhi t’i shesë armë Kievit përmes mekanizmit PURL, të koordinuar nga NATO-ja, ku pjesa më e madhe e dërgesave financohet nga aleatët evropianë të Ukrainës.
