Interpretimi i këngës nacionaliste serbe “Oj Kosovo, Kosovo” gjatë koncertit që hapi Forumin e Zgjerimit të Bashkimit Evropian në Bruksel ka nxitur reagimin e ambasadorit të Kosovës në Bruksel, Agron Bajrami.
Diplomati ka kërkuar që Komisioni Evropian dhe komisionerja për Zgjerim, Marta Kos, të shpjegojnë pa vonesë se si u përzgjodh dhe u miratua repertori i këtij aktiviteti, transmeton “Bota sot”.
Të lidhura
None found
Në qëndrimin e tij, Bajrami ka kundërshtuar paraqitjen e kësaj kënge në një organizim zyrtar të Komisionit Evropian. Sipas ambasadorit, ajo nuk shërben si shkëmbim kulturor, por shpreh pretendime politike mbi territorin e Republikës së Kosovës.
Duke shtjelluar reagimin, ai ka vënë në dukje se koncerti inaugurues i Forumit të Zgjerimit të BE-së ishte organizuar nga Komisioni Evropian nën drejtimin e komisioneres Marta Kos dhe se në programin e tij ishte interpretuar kënga nacionaliste serbe “Oj Kosovo, Kosovo”.
Për Bajramin, mesazhet e qarta politike që kjo këngë përcjell ndaj territorit të Republikës së Kosovës e bëjnë të papranueshme përfshirjen e saj në një veprimtari zyrtare të Bashkimit Evropian, që i kushtohet zgjerimit, unitetit dhe fqinjësisë së mirë.
Ambasadori ka theksuar se Republika e Kosovës pret menjëherë sqarime nga Komisioni Evropian dhe komisionerja Kos për procedurën e përzgjedhjes dhe të miratimit të repertorit.
Në përfundim të reagimit, Bajrami ka nënvizuar se ofrimi i një hapësire për pretendime irredentiste kundër një vendi që synon të bëhet anëtar i Bashkimit Evropian bie ndesh me vlerat evropiane, marrëdhëniet e fqinjësisë së mirë dhe besueshmërinë e procesit të zgjerimit të BE-së.
