Ndeshja e parë e Argjentinës pas largimit të Leo Messi nga kombëtarja përfundoi keq dhe në një atmosferë të zymtë. “Selección” humbi 2-1 një ndeshje miqësore kundër Uruguait në ‘La Bombonera’, një stadium që rrallë shihet kaq bosh.
Trajneri i Argjentinës, Lionel Scaloni, kërkoi durim lidhur me integrimin e lojtarëve të rinj në epokën pas Messi. Ai vuri në dukje disa momente të mira nga skuadra, veçanërisht në pjesën e dytë, duke shtuar: “Natyrisht, ka gjëra që duhen korrigjuar. E dinim se do të ishte një kundërshtar i vështirë. Duhet të vazhdojmë të punojmë.”
Duke iu referuar lojtarëve të sapoardhur, ai shpjegoi se ata nuk duhet të ngarkohen me presion të tepruar. “Këta janë djem të rinj që kanë shumë për të ofruar. Nuk mund të presim që ata ta mbajnë skuadrën mbi supe. Është një detyrë e vështirë, veçanërisht kundër një rivali të madh“, tha Scaloni.
Ai theksoi më tej dëshirën e tij për t’i dhënë vazhdimësi grupit, duke shmangur ndryshimet e vazhdueshme: “Plani nuk është që skuadra të jetë në një gjendje ndryshimesh të pandërprera. Duam t’u ofrojmë pak stabilitet këtyre djemve. Ata duhet të jenë në gjendje të luajnë me qetësi”.
“E dimë që superyjet nuk janë më këtu, por e dimë gjithashtu se lojtarët që kanë mbetur janë shumë të talentuar. Reagimi i skuadrës ishte i mirë pasi e gjeti veten në disavantazh prej dy golash. Tani të përgatitemi për ndeshjen e ardhshme kundër Kosta Rikës. Do të bëjmë disa ndryshime. Disa lojtarë mund të luajnë sërish”, tha Scaloni.







