Rajoni

Pas zgjedhjeve në Serbi/ Jep dorëheqjen drejtoresha e Tanjug, agjencisë së lajmeve pranë Vuçiç!

Ndryshimet në mediat serbe pas humbjes së partisë së Aleksandër Vuçiçit në zgjedhjet parlamentare po vijojnë. Jovana Joksimović, drejtoresha dhe kryeredaktorja e agjencisë së lajmeve Tanjug, ka dhënë dorëheqjen pas gjashtë vitesh në këtë detyrë.

Tanjug konsiderohet një prej mediave të afërta me pushtetin e ish-presidentit serb, ndërsa largimi i Joksimović vjen në një kohë kur disa prej drejtuesve të mediave në vend po largohen nga pozicionet e tyre pas fitores së lëvizjes studentore dhe humbjes së Partisë Progresive Serbe të Vuçiçit.

Në një email drejtuar punonjësve, Joksimović shpjegoi se kishte vendosur të përqendrohej te televizioni K1, ku drejton programin e mëngjesit. Ajo falënderoi stafin për bashkëpunimin gjatë gjashtë viteve në krye të agjencisë, ndërsa nuk bëri të ditur emrin e pasuesit.

LEXO EDHE: Arrestime në Serbi, biznesmeni i lidhur me vëllain e Vuçiçit ia mbath drejt Turqisë! Emri i tij në dosjet për krime në Kosovë!

Ndërkohë, mediat serbe raportojnë se në Tanjug pritet të kalojë Nikolina Rakić, ish-redaktore e RTS-së, e cila u largua nga detyra në kuadër të ndryshimeve të fundit në televizionin publik. Edhe drejtoresha e RTS-së, Manja Grčić, dha dorëheqjen pas fitores së opozitës studentore.

Vuçiç dha dorëheqjen nga presidenca në shtator, përpara zgjedhjeve, ndërsa pas humbjes së partisë së tij në votimet e 25 tetorit tashmë është në opozitë. Fitorja e lëvizjes studentore ka nxitur një valë dorëheqjesh, shkarkimesh dhe ndryshimesh në institucionet dhe mediat që kanë qenë të lidhura me pushtetin e mëparshëm.

LEXO EDHE: Video/ “Kudo që shkoj, përsëri tek ti kthehem”, Vuçiç këndon për Kosovën pas humbjes në zgjedhje

JavaScript is required for tabnav widget to work properly.