E hënë, 16 nëntor 2026 DENONCO ANONIM Denonco: +355 69 20 95 843
PUBLIK PUBLIK
Reforma Zgjedhore në prag të vendoreve 2027, OSBE thirrje palëve për konsensus
Lajme

Reforma Zgjedhore në prag të vendoreve 2027, OSBE thirrje palëve për konsensus

Nesër provohet sërish mbledhja e Komisionit

Reforma Zgjedhore rikthehet në qendër të diskutimeve politike, ndërsa koha në dispozicion për Komisionin e Posaçëm Parlamentar po shkon drejt fundit. Me zgjedhjet vendore të 9 majit 2027 në horizont dhe mandatin e Komisionit që përfundon më 30 nëntor, Prezenca e OSBE-së në Shqipëri u ka kërkuar palëve politike të përshpejtojnë punën për adresimin e rekomandimeve të OSBE/ODIHR-it.

Kryetari i Prezencës së OSBE-së, ambasadori Michel Tarran, zhvilloi sot një takim me dy bashkëkryetarët e Komisionit të Posaçëm Parlamentar për Realizimin e Reformës Zgjedhore, Damian Gjiknuri nga Partia Socialiste dhe Oerd Bylykbashi nga Partia Demokratike.

Në fokus të diskutimit ishte ecuria e reformës dhe hapat që duhet të ndërmerren përpara zgjedhjeve të ardhshme vendore. Tarran vuri në dukje rëndësinë e shfrytëzimit të kohës së mbetur për të realizuar ndryshimet e nevojshme ligjore, duke theksuar se rekomandimet e OSBE/ODIHR-it duhet të trajtohen në kohë dhe përmes një procesi gjithëpërfshirës, ku të angazhohen të gjitha palët politike.

Sipas ambasadorit, përparimi në këtë drejtim është i rëndësishëm për rritjen e besimit të qytetarëve te proceset zgjedhore. Prezenca e OSBE-së ka rikonfirmuar gjithashtu gatishmërinë për të mbështetur dialogun politik dhe përpjekjet për një reformë të dakordësuar mes palëve.

Nesër një tjetër përpjekje për mbledhjen e Komisionit

Ndërkohë, ditën e nesërme pritet të tentohet sërish zhvillimi i një mbledhjeje të Komisionit të Posaçëm Parlamentar për Reformën Zgjedhore. Mbledhja është parashikuar në orën 12:30, në sallën “Pjetër Arbnori”, ndërsa në rendin e ditës janë përfshirë tri çështje kryesore.

Pika e parë lidhet me udhëzimin e ekspertëve të Komisionit për të nisur punën mbi draftet ligjore që do të paraqiten nga opozita. Së bashku me propozimet e saj, ekspertët do të duhet të shqyrtojnë edhe rekomandimet e OSBE/ODIHR-it që ende nuk janë adresuar.

Një tjetër çështje që pritet të shqyrtohet është përcjellja e projektligjit për financimin e partive politike në Komisionin e Venecias, me qëllim marrjen e një opinioni mbi përmbajtjen e tij.

Në pikën e tretë parashikohet orientimi i ekspertëve për të punuar mbi ndërhyrjet ligjore më urgjente që nevojiten për organizimin e zgjedhjeve të ardhshme vendore.

Mbetet për t’u parë nëse mbledhja e nesërme do të zhvillohet dhe nëse palët do të arrijnë të avancojnë me çështjet e parashikuara në rendin e ditës, në kushtet kur afati i Komisionit përfundon më 30 nëntor dhe zgjedhjet vendore të vitit 2027 po afrohen.

Na ndiqni në YouTubeVideo, intervista dhe transmetime nga PUBLIK TV Abonohu

Keni një histori? Denonco anonimisht, identiteti juaj mbrohet.

Denonco
DENONCO

Zëri yt bëhet lajm.

Bëhu pjesë aktive e Publik.al. Raporto çdo padrejtësi, korrupsion apo ngjarje, me foto dhe video. Identiteti yt mbrohet nga redaksia.