Mijëra klientë në Shtetet e Bashkuara janë përballur të hënën me ndërprerje të shërbimeve bankare online në disa prej institucioneve më të mëdha financiare të vendit. Problemet kanë prekur aksesin në llogaritë bankare, kontrollin e gjendjes së tyre dhe kryerjen e transaksioneve.
Sipas raportimeve të publikuara nga Downdetector, platforma që monitoron ndërprerjet e shërbimeve online, vështirësi janë konstatuar te JPMorgan Chase, Bank of America, U.S. Bank, Wells Fargo, si dhe te platforma e pagesave Zelle.
Të dhënat e Downdetector tregojnë se deri në orën 18:45 GMT ishin regjistruar më shumë se 4 600 raportime për probleme me Chase dhe mbi 1 500 për Bank of America.
Disa klientë të Chase u përballën me një mesazh gabimi gjatë përpjekjeve për të përdorur shërbimet online: “Disa shërbime nuk janë të disponueshme. Po punojmë për t’i rikthyer ato. Ju lutemi, provoni përsëri më vonë”.
Vetë banka konfirmoi problemin në një përgjigje ndaj një klienti në platformën X, duke bërë të ditur se po punonte për rikthimin e shërbimeve dhe duke u kërkuar përdoruesve të provonin sërish më vonë.
Sipas CNBC, deri në atë moment nuk kishte të dhëna që ndërprerja e shërbimeve të JPMorgan Chase të ishte shkaktuar nga aktorë keqdashës apo nga një sulm kibernetik.
Shkaku i problemeve nuk është bërë ende i ditur. Gjithashtu, nuk ka prova që ndërprerjet e raportuara në institucionet e ndryshme financiare të kenë pasur një burim të përbashkët.
Downdetector mbledh raportimet që dërgohen nga vetë përdoruesit, ndaj numrat e publikuar nuk përfaqësojnë domosdoshmërisht totalin e klientëve të prekur nga ndërprerjet.

