Bajraktari: BE-ja shpesh aplikon standarde të dyfishta ndaj Kosovës, aleati më i besuar mbetet SHBA-ja

Biznesmeni dhe veprimtari shqiptaro-amerikan, Harry Bajraktari, ka reaguar pas fjalimit të ekspertes së politikës së jashtme, Donika Emini, në një aktivitet në zemër të Evropës, duke kritikuar Bashkimin Evropian për, siç thotë ai, zbatimin e standardeve të dyfishta ndaj Kosovës.
Në një reagim të publikuar në platformën X, Bajraktari ka përgëzuar Eminin për fjalimin e saj, të cilin e ka cilësuar si të fuqishëm, ndërsa ka shprehur kritika ndaj qasjes së institucioneve evropiane në raport me Kosovën.
Ai ka thënë se Bashkimi Evropian shpesh nuk i respekton vlerat demokratike që pretendon se i mbron.
“Fatkeqësisht, Bashkimi Evropian shumë shpesh zbaton standarde të dyfishta dhe dështon të respektojë vlerat demokratike që pretendon se i mbron”, ka shkruar Bajraktari.
Duke iu referuar zhvillimeve të fundit dhe skandalit të krijuar pas interpretimit të një kënge serbe me përmbajtje që cenon sovranitetin e Kosovës në një aktivitet në kuadër të institucioneve evropiane, Bajraktari ka theksuar se bota duhet ta kuptojë se Kosova është shtet i lirë, i pavarur, sovran dhe demokratik.
Sipas tij, tolerimi i mesazheve të tilla brenda institucioneve evropiane dëshmon se Kosova nuk ka aleat më të rëndësishëm dhe më të besueshëm sesa Shtetet e Bashkuara të Amerikës.
“Bota duhet ta kuptojë, një herë e përgjithmonë, se Kosova është shtet i lirë, i pavarur, sovran dhe demokratik. Skandali i fundit i tolerimit të mesazheve që cenojnë sovranitetin e Kosovës brenda institucioneve evropiane tregon se Kosova nuk ka aleat më të rëndësishëm dhe më të besueshëm sesa Shtetet e Bashkuara të Amerikës”, ka shkruar ai.
Në fund të reagimit, Bajraktari ka përcjellë një mesazh për Shtetet e Bashkuara të Amerikës, Kosovën dhe shqiptarët.
“Zoti e bekoftë Amerikën dhe popullin amerikan, Zoti e bekoftë Kosovën dhe të gjithë popullin shqiptar!”, ka përfunduar ai. /Telegrafi/
🇽🇰🇽🇰🇽🇰 I commend foreign policy expert Donika Emini for this powerful speech in the heart of Europe!Unfortunately, the European Union 🇪🇺 too often applies double standards and fails to respect the democratic values it claims to uphold.The world must understand, once and for all, that Kosovo is a free, independent, sovereign and democratic state. The recent scandal of tolerating messages that undermine Kosovo’s sovereignty inside European institutions shows that Kosovo has no more important and trusted ally than the United States of America 🇺🇸🇺🇸God bless America and the American people, God bless Kosovo and all Albanian people!▶️ Video: @Telegrafisti #HarryBajraktari @EUKosovo @EUCouncil @EU_Commission @DigitalEU @MartaKosEU @vonderleyen @StateEUR @USEmbPristina @KonjufcaGlauk
— Harry Bajraktari (@HarryBajraktari) November 16, 2026






































