Kryeministri Edi Rama ka reaguar me tone ironike ndaj gazetarit irlandez Chay Bowes, pas përfshirjes së këtij të fundit në listën e sanksioneve të Bashkimit Europian. Rama e akuzon atë për përhapje të propagandës ruse dhe vë në pikëpyetje qëndrimet e tij kritike ndaj Shqipërisë.
Në një postim në platformën X, kreu i qeverisë e cilëson Bowes si “kloun të paguar nga Rusia”, ndërsa lidh vëmendjen e gazetarit ndaj vendit tonë me përparimin e Shqipërisë në procesin e integrimit europian.
“Ja dhe një kloun i propagandës ruse që sot u sanksionua nga Bashkimi Europian pikërisht si kloun i paguar nga Rusia. Po me Shqipërinë pse? Se Shqipëria e teproi me ngjitjen e saj lart dhe afrimin e shpejtë te objektivi historik: Anëtarësimi në Bashkimin Europian”, shkruan Rama.
Reagimi i kryeministrit vjen pas lajmit për vendosjen e gazetarit irlandez në listën e masave kufizuese të BE-së, ndërsa Rama e përdor këtë zhvillim për të kundërshtuar edhe qëndrimet e tij ndaj Shqipërisë.

