Aksident tragjik në Britani, dy të rinj humbin jetën, makina e tyre u përplas nga një automjet që ndiqej nga policia

17 Nëntor 2026 | 07:42

Dy persona, 22 dhe 23 vjeç, kanë humbur jetën në qytetin e Leedsit, në Mbretërinë e Bashkuar, pasi automjeti me të cilin udhëtonin u përplas nga një BMW që po ndiqej nga policia.

Ngjarja ndodhi në orët e para të së dielës, në rrugën Gelderd Road. Sipas policisë së West Yorkshire, rreth orës 00:44, një automjet tip BMW 123D, me ngjyrë blu, nuk iu bind urdhrit të një patrulle policie për të ndaluar, duke nisur kështu ndjekjen.

Gjatë ndjekjes, BMW-ja u përplas me një automjet tip Volkswagen Scirocco, me ngjyrë të bardhë, i cili po kthehej në rrugën Gelderd Road.

Drejtuesi i Volkswagen-it, një 22-vjeçar nga Yorku, u shpall i vdekur në vendngjarje, ndërsa pasagjerja që udhëtonte me të, një 23-vjeçare po nga Yorku, ndërroi jetë pak më vonë në spital. Identitetet e viktimave nuk janë bërë ende publike zyrtarisht.

Në lidhje me ngjarjen janë arrestuar katër persona. Një 39-vjeçar nga Harrogate dyshohet për shkaktim të vdekjes nga drejtimi i rrezikshëm i automjetit dhe drejtim të mjetit nën efektin e kanabisit, mbi kufirin e lejuar. Ai vijon të mbahet në paraburgim.

Ndërkohë, tre personat e tjerë që ndodheshin në BMW, dy djem të moshës 16 dhe 17 vjeç dhe një vajzë 16-vjeçare, u transportuan në spital për të marrë ndihmë mjekësore. Lëndimet e tyre nuk konsiderohen kërcënuese për jetën. Të tre janë arrestuar gjithashtu nën dyshimin për shkaktim të vdekjes nga drejtimi i rrezikshëm i automjetit.

Policia e West Yorkshire ka referuar rastin pranë Zyrës së Pavarur për Sjelljen e Policisë (IOPC), e cila ka nisur një hetim të pavarur për të zbardhur rrethanat e aksidentit.

Një zëdhënës i IOPC-së bëri të ditur se hetuesit kanë mbërritur në vendngjarje rreth orës 02:30, pasi ishin njoftuar nga policia, dhe kanë nisur mbledhjen e provave. Sipas tij, hetimet janë ende në një fazë shumë të hershme.

Pas aksidentit, zona u rrethua nga policia, ndërsa në vendngjarje mbërritën zjarrfikësit, ambulancat dhe disa automjete policie. Në mëngjesin e së dielës, perimetri i sigurisë vijonte të ishte në fuqi, ndërsa drejtuesve të automjeteve iu kërkua të shmangnin zonën.

Policia u ka bërë thirrje dëshmitarëve të mundshëm që të japin informacion për ngjarjen, si dhe personave që disponojnë pamje nga kamerat e automjeteve, telefonat celularë apo kamerat e sigurisë, që mund të ndihmojnë në hetim.

Home Kryefaqja
Shiko në: YouTube
Lajme të Sugjeruara

Raketat balistike ruse godasin dy ura në Kiev, kryebashkiaku Klitschko njofton për dëme në infrastrukturë

Dy ura të mëdha në kryeqytetin ukrainas, Kiev, janë goditur nga sulmet me raketa balistike ruse, ka deklaruar kryebashkiaku i qytetit, Vitali Klitschko. Sulmet kanë...
07:35 | 17/11/2026

Incident i papritur në Peru, Papa Leo lëndon syrin nga një objekt i hedhur nga një besimtar (VIDEO)

Një incident u regjistrua në paraqitjen e fundit publike të Papa Leo XIV  në Peru, pasi dikush në turmë i hodhi një rruzare, duke e...
22:27 | 16/11/2026

Netanyahu paralajmëron Evropën: Raketat e Iranit nuk ndalen në Izrael! Jeni edhe ju shënjestër, jo spektatorë

Kryeministri izraelit, Benjamin Netanyahu lëshoi ​​një paralajmërim për Evropën në lidhje me kërcënimin që paraqet Irani gjatë një takimi me homologun e tij çek Andrej...
22:15 | 16/11/2026