Kevin Margjoni, alias Arjan Margjoni, 49 vjeç, është ekstraduar nga Spanja në Shqipëri, në kuadër të operacionit ndërkombëtar të koduar “The Wanted”. Ai akuzohet si një nga bashkëfinancuesit dhe negociatorët e trafikimit të 485 kilogramëve kokainë, të sekuestruara në vitin 2022 në fshatin Frakull e Madhe të Fierit.
Policia e Shtetit njofton se ekstradimi u realizua falë koordinimit operacional ndërmjet specialistëve të Drejtorisë së Interpolit dhe homologëve të Interpol Madridit.
Sipas hetimeve, Margjoni dyshohet se, në kuadër të grupit kriminal ku bënte pjesë, ka pasur rolin e njërit prej financuesve dhe negociatorëve të trafikut të sasisë prej 485 kilogramësh kokainë, e cila u zbulua e fshehur në thasë me pleh kimik në vitin 2022, në Frakull të Fierit.
Në mars të vitit 2026, Gjykata e Posaçme e Shkallës së Parë për Korrupsionin dhe Krimin e Organizuar i kishte caktuar 49-vjeçarit masën e sigurisë “Arrest në burg”.
Ai akuzohet për veprat penale “Trafikimi i lëndëve narkotike”, kryer në bashkëpunim dhe në formën e grupit të strukturuar kriminal, “Kryerja e veprave penale nga organizata kriminale ose grupi i strukturuar kriminal” dhe “Grupi i strukturuar kriminal”.
Ekstradimi i Margjonit është një tjetër fazë e operacionit ndërkombëtar “The Wanted”, në kuadër të bashkëpunimit mes autoriteteve shqiptare dhe atyre spanjolle për kapjen e personave të shpallur në kërkim ndërkombëtar.



