Ish-drejtoresha e Agjencisë Kombëtare të Shoqërisë së Informacionit, Mirlinda Karçanaj është paraqitur sot në Prokurorinë e Posaçme, në zbatim të masës së sigurisë “detyrim paraqitje”.
Sipas masës së caktuar, Karçanaj duhet të paraqitet pranë Policisë Gjyqësore të martën e parë dhe të tretë të çdo muaji dhe krahas kësaj mase, ndaj saj vijon të jetë në fuqi edhe ndalimi i daljes jashtë shtetit, ndërsa i është sekuestruar pasaporta.
Më herët, ish-drejtoresha e AKSHI-t ishte nën masën e sigurisë “arrest në shtëpi”, megjithatë, pas rekursit të paraqitur nga mbrojtja, Gjykata e Lartë vendosi ndryshimin e masës së sigurisë në “detyrim paraqitje”.
Karçanaj është nën hetim nga SPAK për akuza që lidhen me shkeljen e barazisë së pjesëmarrësve në tendera, në kuadër të një grupi të strukturuar kriminal.












