Thaçi dënohet me 17 muaj burgim për pengim të drejtësisë
Ish-presidenti i Kosovës, Hashim Thaçi, është dënuar me 17 muaj burgim nga Dhomat e Specializuara të Kosovës (DhSK) në Hagë, lidhur me akuzat për vepra penale kundër administrimit të drejtësisë, në rastin ku bashkë me të akuzoheshin edhe Bashkim Smakaj, Isni Kilaj, Fadil Fazliu dhe Hajredin Kuçi.
Aktgjykimi u shpall të martën nga gjykatësi Christopher Gosnell.
Kundër Thaçit rëndonin tri akuza për tentativë të pengimit të personave zyrtarë në kryerjen e detyrave zyrtare, katër akuza për shkelje të fshehtësisë së procedurës dhe katër për mosbindje ndaj gjykatës.
Ai u shpall fajtor për “Tentativë të pengimit të personave zyrtarë në kryerjen e detyrave zyrtare” me anë të veprimit të përbashkët, për “Shkelje të fshehtësisë së procedurës” dhe për “Mosbindje ndaj gjykatës”.
Ndaj tij u shpall dënim unik me 17 muaj burgim. Ndërkaq, u shpall i pafajshëm për një vepër të “Tentativës së pengimit ndaj një personi zyrtar”.















