Trajneri spanjoll Xabi Alonso po planifikon të përforcojë skuadrën e Chelseat dhe ka identifikuar mbrojtësin italian Alessandro Bastoni si një nga objektivat kryesorë për afatin kalimtar të verës së vitit 2027.

Mbrojtësi 27-vjeçar i Interit është shndërruar në një nga emrat që po ndiqen nga afër nga klubi londinez, i cili tashmë ka shfaqur interesim konkret për shërbimet e tij.


Sipas raportimeve të TEAMtalk, Chelsea ka dërguar përfaqësues për ta vëzhguar nga afër Bastonin gjatë ndeshjes së fundit mes Italisë dhe Francës, të cilën italianët e fituan me rezultat 3-1.

Përveç Chelseat, interesim për qendërmbrojtësin kanë shfaqur edhe Liverpooli, Manchester Unitedi, Manchester City dhe Bayern Munichu. Megjithatë, sipas këtyre raportimeve, Chelsea aktualisht konsiderohet klubi anglez që ka pozicionin më të favorshëm për të tentuar transferimin e tij.

Bastoni shihet si një përforcim që do t'i përshtatej filozofisë së Xabi Alonsos, i cili ka preferuar sistemin me tre qendërmbrojtës që nga ardhja e tij në Londër. Italiani ka përvojë të madhe në këtë skemë dhe mund të luajë në krahun e majtë të repartit defensiv.

Deri më tani, bisedimet kanë qenë në nivelin e kontakteve me përfaqësuesit e futbollistit, të cilët po shqyrtojnë mundësitë për të ardhmen e tij. Megjithatë, nuk ka ende ndonjë ofertë zyrtare apo marrëveshje mes klubeve.

Interi nuk ka ndërmend ta lehtësojë largimin e një prej futbollistëve më të rëndësishëm të skuadrës. Bastoni ka kontratë me klubin italian deri më 30 qershor 2028, ndërsa vlera e tij në tregun e transferimeve, sipas Transfermarkt, vlerësohet në 65 milionë euro.

Ndërkohë, drejtuesit e Interit synojnë t'ia vazhdojnë kontratën mbrojtësit për të shmangur rrezikun që ai të hyjë në verën e vitit 2027 me vetëm një vit të mbetur në marrëveshjen aktuale.

Raportimet për çmimin e mundshëm të transferimit flasin për një shumë rreth 80 milionë euro. Kjo kërkesë financiare kishte ndikuar edhe në interesimin e klubeve të tjera gjatë afateve të mëparshme kalimtare.

Në mesin e skuadrave që kishin shqyrtuar mundësinë e transferimit të tij ishte edhe Barcelona. Megjithatë, sipas TEAMtalk, ekzistojnë dyshime nëse katalunasit do të paraqesin ofertë, pasi nga rrethi i futbollistit besohet se trajneri Hansi Flick nuk është plotësisht i bindur për përshtatjen e tij në skuadër.

Kjo situatë mund t'i krijojë hapësirë Chelseat për të avancuar në negociata, nëse Xabi Alonso vazhdon të insistojë për transferimin e italianit. Bastoni, nga ana tjetër, dëshiron të jetë i qartë për rolin që do të kishte në projektin sportiv të klubit të ardhshëm përpara se të marrë një vendim për të ardhmen.

Liverpooli, ndërkohë, po e monitoron situatën, por transferimi i Jeremy Jacquet ka bërë që nevoja për një tjetër qendërmbrojtës të mos jetë aq urgjente. Manchester City, Manchester Unitedi dhe Bayern Munichu gjithashtu vazhdojnë të jenë të vëmendshëm ndaj zhvillimeve rreth futbollistit.

E ardhmja e Bastonit pritet të varet në një masë të madhe nga negociatat për rinovimin e kontratës me Interin. Nëse palët nuk arrijnë marrëveshje deri në verën e vitit 2027, klubi italian mund të detyrohet të shqyrtojë ofertat për të shmangur rrezikun e humbjes së tij me parametra zero një vit më vonë.

Chelsea, me Xabi Alonson në krye, synon të jetë një nga klubet që do të tentojë ta bindë Interin për shitjen e mbrojtësit. /Telegrafi/