Policia turke ka bastisur këtë të martë selinë e televizionit pro-opozitar Sozcu TV në Stamboll duke arrestuar administratorë dhe duke emëruar një administrator qeveritar si kryetar. Vetë kanali ka njoftuar përmes një postimi se policia po kontrollonte ndërtesën me urdhër gjykate.
Çfarë tha Sozcu për bastisjen e policisë turke?
“Policia po kontrollon ndërtesën Sozcu me urdhër gjykate. Policia ka rrethuar ndërtesën”, thuhet në llogarinë zyrtare të X pak para orës 5 të mëngjesit (02:00 GMT). “Një administrator është emëruar në Sozcu! Policia po kontrollon ndërtesën… Ka pasur ndalime”, citoi gazeta, ndërsa gazetarët e saj thanë se stafi nuk lejohej të hynte brenda.
Sipas grupit mediatik, administratori mori kontrollin e kanalit televiziv dhe faqes së internetit të lajmeve, por jo të gazetës së shtypur. Pas bastisjes, transmetimet e rregullta të lajmeve u ndaluan dhe në vend të tyre u shfaq një dokumentar.
Në mesditë, kanali rifilloi mbulimin e rregullt, duke përmendur bastisjet vetëm në fillim të transmetimit. Një nga prezantueset e lajmeve të kanalit, Damla Dogan Tuncel, tha në X se kanali e kishte kundërshtuar vendimin dhe po priste një vendim gjykate.
“Ndërkohë, transmetimi do të vazhdonte me buletinet normale të lajmeve,” tha ajo. Zyra e Prokurorit Publik të Stambollit ka deklarur se veprimi kundër Sozcu TV ishte pjesë e një hetimi mbi shkeljet e dyshuara të “ligjeve kundër financimit të terrorizmit” të Turqisë.
Zyra e prokurorit pretendoi se kanali dyshohej se kishte lidhje me një rrjet që drejtohej nga kleriku me bazë në SHBA, Fethullah Gulen. Kleriku, i cili vdiq në vitin 2024, u akuzua nga Turqia për orkestrimin e një grushti shteti të dështuar ushtarak në vitin 2016.
Avokati i Grupit Mediatik Sozcu, Ersan Barkin, shtoi se bastisjet buruan nga një çështje e vitit 2016 që Gjykata Supreme e Turqisë e kishte hedhur poshtë më parë, duke mos gjetur prova për qëllim kriminal apo keqbërje. Nga ana tjetër edhe transmetimi i televizionit u ndërpre për disa orë pas pengesës së stafit për tu futur ne ambientet e Sozcu TV.
