Çokollata Kinder Bueno White është tërhequr nga shitja në rrjetin e supermarketeve NORMAL në Itali, pasi është konstatuar një pasaktësi në etiketimin e përbërësve, e cila mund të përbëjë rrezik për personat alergjikë ndaj grurit dhe ata që vuajnë nga sëmundja celiake.
Sipas mediave italiane, produkti i prekur është paketa njëporcionale prej 43 gramësh, me kodin EAN 80761761.
Problemi lidhet me listën e përbërësve, ku nuk janë deklaruar siç duhet dy përbërës që rrjedhin nga gruri: mielli i grurit dhe niseshteja e grurit. Kjo mangësi në etiketim mund të bëjë që konsumatorët me alergji ndaj proteinave të grurit ose me sëmundje celiake të mos informohen për praninë e tyre në produkt.
Në njoftimin e publikuar nga rrjeti NORMAL, personat që e kanë blerë këtë produkt këshillohen të mos e konsumojnë nëse kanë alergji ndaj grurit ose vuajnë nga sëmundja celiake, por ta kthejnë në dyqanin ku e kanë blerë, ku do t’u rimbursohet vlera e paguar.
Tërheqja lidhet me problemin e deklarimit të përbërësve në etiketë dhe nuk nënkupton se është konstatuar një problem tjetër me sigurinë e produktit.

