Tensionet ushtarake në Lindjen e Mesme u përshkallëzuan sërish më 18 nëntor, me një valë të re sulmesh në orët e para të së mërkurës. Bahreini njoftoi se sistemet e tij të mbrojtjes ajrore kishin zmbrapsur disa sulme ajrore që i atribuohet Iranit, sipas një deklarate të Shtabit të Përgjithshëm të Mbrojtjes të transmetuar nga agjencia zyrtare BNA. Autoritetet bahreineze nuk dhanë detaje mbi numrin e objektivave të prekur ose zonat e shënjestruara. Bahreini konsiderohet pikë strategjike në rajon, pasi në territorin e tij ndodhet edhe selia e Flotës së Pestë të Marinës Amerikane.
Në Kuvajt u aktivizuan sistemet kundërajrore pas sinjalizimeve për dronë të cilësuar si armiqësorë. Shtabi i Përgjithshëm i Mbrojtjes njoftoi në platformën X se shpërthimet e dëgjuara në disa zona ishin shkaktuar nga ndërhyrja e këtyre sistemeve, të cilat kishin kapur objektivat në ajër. Deri në raportimin e mëparshëm, autoritetet kuvajtiane nuk kishin konfirmuar origjinën e dronëve dhe nuk kishin dhënë informacion për dëme materiale apo viktima.
Paralelisht, Shtetet e Bashkuara kryen një sulm ajror në territorin iranian, duke goditur një strukturë për lëshimin e raketave në ishullin Qeshm, në Ngushticën e Hormuzit. Lajmi u konfirmua nga një zyrtar ushtarak amerikan për agjencinë Reuters, i cili tha se goditja ishte një kundërpërgjigje ndaj sulmeve iraniane kundër personelit dhe instalimeve ushtarake amerikane në rajon. Nga ana tjetër, agjencia iraniane e lajmeve Mehr raportoi se sulmi nuk kishte shkaktuar dëme në zonat e banuara apo në infrastrukturën e ishullit.
Raportimet e ditës pasqyrojnë një rritje të përplasjeve ushtarake në Gjirin Persik dhe theksojnë se përpjekjet diplomatike deri tani nuk kanë ndaluar shkëmbimin e sulmeve midis palëve. Autoritetet përkatëse në Bahrein dhe Kuvajt nuk kanë ofruar detaje shtesë rreth objektivave të goditura ose ndikimit të saktë të ndërhyrjeve, ndërsa burimet zyrtare amerikane kanë identifikuar sulmin në Qeshm si një veprim hakmarrës ndaj goditjeve ndaj forcave amerikane.
