Kryetari i Partisë Demokratike, Sali Berisha, ka akuzuar kryeministrin Edi Rama se ka ndërtuar një rrjet njerëzish në sektorë të ndryshëm të ekonomisë dhe prokurimeve publike, të cilët, sipas tij, veprojnë në funksion të interesave të kryeministrit.
Në një deklaratë për mediat, para Parlamentit, Berisha iu referua raportit të fundit të EUROSTAT-it për të ardhurat dhe varfërinë, duke theksuar se rritja e të ardhurave për frymë në Shqipëri është rezultat i manipulimit të të dhënave dhe jo i përmirësimit të ekonomisë.
Sipas Berishës, Fondi Monetar Ndërkombëtar ka llogaritur prodhimin e brendshëm bruto për frymë duke përdorur një numër më të vogël të popullsisë, rreth 500 mijë shqiptarë më pak, çka, sipas tij, ka bërë që të ardhurat për frymë të paraqiten rreth 1 mijë dollarë më të larta se një vit më parë.
Ai tha gjithashtu se zhvlerësimi i dollarit, të cilin e lidhi me atë që e quajti “narkodollarë”, ka ndikuar në rritjen e treguesve të të ardhurave, ndërsa qytetarët shqiptarë po përballen me varfëri më të madhe dhe kosto më të larta jetese.
Berisha akuzoi më tej Ramën se ka njerëzit e tij në çdo sektor të prokurimeve dhe ekonomisë, duke përmendur AKSHI-n, shëndetësinë, energjetikën dhe infrastrukturën.
“Të ardhurat e shqiptarëve grabiten në mënyrën më të paskrupullt nga lukunia, nga organizata kriminale që quhet qeveri dhe Padrino i cili ka Gysët”, deklaroi Berisha.
Ai tha se pasuria e Ramës e depozituar në bankat offshore, e cila sipas tij në vitin 2014 ishte 200 milionë euro, sot ka kaluar të paktën 2 miliardë euro.
“Por unë zotohem para shqiptarëve se do gjenden. Fatmirësisht gjurmët janë”, u shpreh kreu i PD-së.
Berisha e mbylli deklaratën me akuza ndaj kryeministrit, duke komentuar edhe pamjen e tij të zbehtë gjatë daljeve publike të fundit.a.b





