Pas 25 vitesh në kërkim, Valentin Ftoni, 52 vjeç, i dënuar dy herë me nga 25 vite burg për tre vrasje në Shkodër, është ekstraduar nga Shtetet e Bashkuara të Amerikës në Shqipëri. Ai u arrestua nga marshallët amerikanë më 8 tetor në Nju Jork, ku ishte fshehur prej dekadash, duke përdorur tre identitete false.
Sipas Policisë së Shtetit, Ftoni përdorte emrat Valentin Bujaj, Parim Hajredini, me identitet kosovar, dhe Alexander Campusano, me identitet të Amerikës Qendrore, për t'iu shmangur autoriteteve shqiptare.
Ekstradimi u krye më 18 nëntor, në përfundim të operacionit ndërkombëtar të koduar “GLOBE”, të zhvilluar në bashkëpunim mes Policisë së Shtetit dhe agjencive federale amerikane, të koordinuara nga DSS/OCIU pranë Ambasadës së SHBA-së në Tiranë.
Ftoni ishte shpallur në kërkim që prej vitit 2001 për vrasje të kryera në qarkun e Shkodrës.
Më 19 shtator 2000, në Ças të Shkodrës, ai vrau në bashkëpunim Gjelosh Markaj dhe Ardiana Markajn, për motive gjakmarrjeje. Për këtë ngjarje, Gjykata e Shkodrës e dënoi më 28 janar 2001 me 25 vite burg për vrasje me paramendim në bashkëpunim dhe armëmbajtje pa leje.
Ndërsa më 12 gusht 2001, Ftoni kreu një tjetër vrasje në Shkodër, ku viktimë mbeti shtetasi Tom Gaci,. Për këtë krim, Gjykata e Shkodrës e dënoi më 18 nëntor 2008 me 25 vite të tjera burg.
Përveç këtyre dy çështjeve, Ftoni është gjykuar edhe për vrasjen e Behar Becit, ngjarje e ndodhur në vitin 2001. Për këtë akuzë ai është shpallur i pafajshëm.
Pas arrestimit në Nju Jork dhe përfundimit të procedurave të ekstradimit, 52-vjeçari iu dorëzua autoriteteve shqiptare nga agjencitë federale ICE-ERO dhe DSS/OCIU për veprimet e mëtejshme procedurale.
Njoftimi i plotë
"Ekstradohet nga Nju Njorku, shtetasi Valentin Ftoni, i dënuar dy herë, me nga 25 vjet burgim, për vrasje.
Në vijim të njotimit të dhënë në muajin tetor 2026 dhe në vazhdën e punës dhe bashkëpunimit ndërkombëtar të Policisë së Shtetit me partnere ligjzbatues të Shteteve të Bashkuara të Amerikës, ku në sajë të një pune të gjatë hetimore ndërmjet këtyre agjensive, më datë 08.10.2026, u arrestua në Nju Jork, shtetasi shqiptar Valentin Ftoni, 52 vjeç, Policia e Shtetit dhe Agjensite Federale Amerikane të koordinuara nga DSS/OCIU në Ambasadën e Shteteve të Bashkuara në Tiranë, kanë përmbyllur fazën përfundimtare të operacionit të qujtur “GLOBE”.
Më datë 18.11.2026, u bë ekstradimi i shtetasit shqiptar Valentin Ftoni, i njohur në Shtetet e Bashkuara, me 3 identitete të falsifikuara si Valentin Bujaj, Parim Hajredini (identitet kosovar) dhe Alexander Campusano (identitet i Amerikës Qendrore). Valentin Ftoni, person me profil të larte kriminal, i dënuar në Shqipëri për vrasje të shumëfishta, u mor në dorëzim nga autoritetet federale amerikane ICE-ERO dhe DSS/OCIU dhe iu vu në dispozicion për veprime të mëtejshme procedurale, autoriteteve shqiptare të cilat e kanë dënuar atë, 2 herë me nga 25 vjet burgim, për disa vrasje të kryera gjate viteve 1998-2001.
Ky shtetas ishte shpallur në kërkim nga autoritetet shqiptare prej vitit 2001, pasi është dënuar 2 herë, me nga 25 vjet burgim, për 3 vrasje të kryera në qarkun e Shkodres, dhe fshihej në ShBA, që pas arratisjes nga Shqipëria, duke shfrytëzuar identitetet e lartpërmendura.
Më datë 28.01.2001, Gjykata e Shkodrës e ka deklaruar fajtor dhe e ka dënuar shettasin Valentin Ftoni, me 25 vjet burgim, për veprat penale “Vrasja me paramendim”, kryer në bashkëpunim dhe “Mbjtja pa leje dhe prodhimi i armëve, armëve shpëthyese dhe municionit”, pasi më datë 19.09.2000, në Cas, Shkodër, ka vrarë shtetasit Gj. M. dhe A. M., për motive gjakmarrjeje.
Gjithashtu, më datë 18.11.2008, Gjykata e Shkodrës e ka deklaruar fajtor dhe e ka dënuar shtetasin Valentin Ftoni, me 25 vjet burgim, për veprat penale “Vrasja me paramendim”, kryer ne bashkëpunim dhe “Mbajtja pa leje dhe prodhimi i armëve, armëve shpëthyese dhe municionit”, pasi më datë 12.08.2001, në Shkodër, ka vrarë shtetasin G. T.
Ky rast, por dhe të tjerë, dëshmojne rritjen e dukshme të bashkëpunimit krah për krah me partneret amerikanë në çështje të hetimeve dhe operacioneve të përbashkëta në fushën e zbatimit te ligit.Edhe ky rast, tregon sërish përkushtimin e Policisë së Shtetit, për rritjen e bashkëpunimit hetimor ndërkombëtar në nivele dypalëshe në terren, ndaj gjejmë rastin edhe një herë të falënderojmë partnerët tanë në Ambasaden e Shteteve të Bashkuara në Tiranë, për ndjekjen e këtij rasti dhe të shumë rasteve të tjera në ShBA, por jo vetëm."








Komente
Komento