E mërkurë, 18 nëntor 2026 DENONCO ANONIM Denonco: +355 69 20 95 843
PUBLIK PUBLIK
Braçe kërkon “kokat” e ministrave: Kush abuzon, të largohet nga qeveria
Lajme

Braçe kërkon “kokat” e ministrave: Kush abuzon, të largohet nga qeveria

Deputeti socialist Erion Braçe ka rikthyer në Kuvend kërkesën për largimin e ministrave që nuk arrijnë të realizojnë shpenzimet e parashikuara në buxhetin e shtetit, duke kritikuar mënyrën se si një pjesë e institucioneve menaxhojnë fondet publike.

Gjatë diskutimeve për projektbuxhetin e vitit 2027, Braçe paralajmëroi se mosrealizimi i të ardhurave dhe shpenzimeve të planifikuara përbën një rrezik serioz për financat publike. Sipas tij, përgjegjësia për këtë situatë nuk mund të mbetet pa pasoja për drejtuesit e institucioneve dhe ministrat që nuk arrijnë të përdorin me efektivitet fondet që u janë vënë në dispozicion.

Socialisti theksoi se nuk mjafton vetëm miratimi i fondeve në letër, nëse më pas ato nuk shpenzohen sipas objektivave të përcaktuara. Ai kërkoi që paaftësia në administrimin e parasë publike dhe, aq më tepër, abuzimi me të, të mos tolerohen nga qeveria.

Braçe rikujtoi se të njëjtën kërkesë e kishte artikuluar edhe një vit më parë në Kuvend, duke këmbëngulur se ministrat që nuk përmbushin detyrimet buxhetore nuk duhet të vijojnë të qëndrojnë në kabinetin qeveritar.

“Mosrealizimi i buxhetit, mosrealizimi i të ardhurave apo shpenzimeve, në variantin që ka disa vite që po ndodh. Vjet këtu thashë që ministrat që nuk realizojnë shpenzimet e planifikuara në buxhetin e shtetit, duhet të ikin nga qeveria. Nuk ua ka borxh kërkush, padijen dhe paaftësinë për të përdorur paranë publike me efektivitet, abuzimin me të jo e jo”, u shpreh deputeti socialist.

Ai nënvizoi se qëndrimi i tij mbetet i pandryshuar edhe gjatë shqyrtimit të buxhetit të ri, duke kërkuar largimin nga detyra të çdo ministri që vë në rrezik realizimin e planit financiar të shtetit.

“Unë i mbetem të njëjtës kërkesë, që kush rrezikon realizimin e buxhetit dhe sjell risk serioz për të, nuk ka pse rri më në qeveri”, deklaroi Braçe.

Na ndiqni në YouTubeVideo, intervista dhe transmetime nga PUBLIK TV Abonohu

Keni një histori? Denonco anonimisht, identiteti juaj mbrohet.

Denonco
DENONCO

Zëri yt bëhet lajm.

Bëhu pjesë aktive e Publik.al. Raporto çdo padrejtësi, korrupsion apo ngjarje, me foto dhe video. Identiteti yt mbrohet nga redaksia.