Gjykata në Itali ka dënuar me nga dy vite burg secilin prej prindërve të Francesco Gianello, 14-vjeçarit që humbi jetën nga një tumor pasi nuk mori trajtimin e nevojshëm mjekësor. Luigi Gianello dhe Martina Binotto u shpallën fajtorë për vrasje nga pakujdesia, pasi zgjodhën për të birin një metodë alternative në vend të mjekimit.
Vendimi u dha nga Gjykata e Apelit e Assizes në Vicenza, e cila rikualifikoi akuzën fillestare për vrasje me dashje në vrasje nga pakujdesia. Gjykata zbatoi gjithashtu uljen e dënimit që parashikohet për gjykimin me procedurë të shkurtuar.
Gjatë procesit, prokuroria kishte shqyrtuar mundësinë e ndryshimit të akuzës, duke përfshirë edhe alternativa të tjera ligjore, si vdekja si pasojë e një vepre tjetër penale apo braktisja e të miturit.
Pas vendimit, avokati i prindërve, Jacopo Roetta, e cilësoi atë si një zhvillim të rëndësishëm për klientët e tij.
“Ky vendim sjell një rreze drite në këndvështrimin tonë, sepse e vendos ngjarjen në një kontekst shumë më të përshtatshëm dhe më të drejtë në raport me akuzën fillestare”, deklaroi ai.
Avokati pretendoi gjithashtu se çështja nuk duhej të ishte shqyrtuar nga Gjykata e Assizes, e cila merret me veprat penale më të rënda.
“Ky proces nuk duhej të zhvillohej përpara organit gjyqësor që shqyrton krimet më të rënda. Këta prindër duhej të ishin kursyer nga gjithë kjo ekspozim mediatik dhe jo vetëm, por mbi të gjitha nga ekspozimi njerëzor”, u shpreh Roetta.
Sipas të dhënave të çështjes, prindërit kishin ndjekur të ashtuquajturën “metoda Hamer”, e njohur edhe si “Mjekësia e re gjermane”, një praktikë alternative e krijuar nga mjeku gjerman Ryke Geerd Hamer. Ajo pretendon se sëmundjet, përfshirë kancerin, lidhen me konflikte emocionale dhe psikologjike, por nuk mbështetet nga prova shkencore dhe nuk njihet si trajtim i vlefshëm mjekësor për tumoret.
Vdekja e 14-vjeçarit ka rikthyer vëmendjen te pasojat e rënda që mund të sjellë zëvendësimi ose vonesa e trajtimeve mjekësore të provuara me praktika alternative të pambështetura shkencërisht.

