“Fol me Kryeministrin”, Rama: Platforma po frekuentohet masivisht nga qytetarët
Kryeministri Edi Rama ka ndarë detaje mbi funksionimin e platformës “Fol me Kryeministrin”, e cila u mundëson qytetarëve të adresojnë drejtpërdrejt shqetësimet dhe problematikat e tyre pranë qeverisë.
Gjatë një vizite në Agjencinë për Media dhe Informim, Rama u njoh me punën që po kryhet nga stafi për administrimin dhe trajtimin e kërkesave të mbërritura përmes kësaj platforme.
Një vëmendje e veçantë, sipas shpjegimeve të dhëna gjatë prezantimit, i kushtohet çështjeve që lidhen me shëndetësinë dhe mbrojtjen sociale. Përgjegjësja për këto fusha trajton shqetësimet e qytetarëve, veçanërisht ato që lidhen me trajtimin dhe përkujdesjen sociale. Sipas të dhënave të bëra publike gjatë vizitës, mbi 70% e rasteve të trajtuara në këtë drejtim kanë marrë përgjigje.
Gjithashtu, në Agjencinë për Media dhe Informim po punohet edhe për prodhimin dhe përgatitjen e materialeve audiovizuale, me synim informimin e qytetarëve.
“Në Agjencinë për Media dhe Informim, ku punohet intensivisht edhe për platformën “Fol me Kryeministrin”, e cila ka një frekuentim mbresëlënës nga qytetarët”, shkruan Rama.
Përmes platformës “Fol me Kryeministrin”, qeveria synon të krijojë një kanal të drejtpërdrejtë komunikimi me qytetarët, ku ankesat dhe kërkesat e tyre të marrin trajtim dhe përgjigje nga strukturat përgjegjëse.
/RTSH.AL/
Të gjitha të drejtat e këtij materiali janë pronë ekskluzive dhe e patjetërsueshme e RTSH, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e RTSH, në të kundërt çdo shkelës do mbajë përgjegjësi sipas nenit 179 të Ligjit 35/2016.
Komentet 0
Ende nuk ka komente. Bëhuni i pari që komenton.




