Sekretari amerikan i Mbrojtjes, Pete Hegseth, ka mbërritur në Bogota të Kolumbisë, ku do të zhvillojë bisedime me zyrtarët vendas për forcimin e bashkëpunimit në fushën e sigurisë dhe luftën kundër trafikut të drogës.
Vizita e tij vjen pas një ndalese të paparalajmëruar në Venezuelë. Hegseth u prit në një bazë ajrore ushtarake nga ministri kolumbian i Mbrojtjes, Jorge Eduardo Mora.
Sipas njoftimeve paraprake, gjatë vizitës zyrtari amerikan pritet të dorëzojë edhe një avion ushtarak të tipit C-130 Hercules.
Gjatë një deklarate të përbashkët me përfaqësuesit e qeverisë kolumbiane, Hegseth theksoi se të dyja vendet do të intensifikojnë përpjekjet kundër organizatave kriminale të përfshira në trafikun e drogës.
“Secili vend, në përputhje me ligjet e veta, por duke punuar së bashku, do të gjejë, ndjekë, godasë dhe mposhtë narkoterroristët”, deklaroi ai.
Hegseth shtoi se synimi i përbashkët është t’u mohohet karteleve të drogës çdo mundësi për të gjetur strehim të sigurt, duke respektuar sovranitetin dhe legjislacionin e secilit shtet.
Ndërkohë, pas një takimi me dyer të mbyllura me zyrtarin amerikan, ministri i Jashtëm kolumbian, Omar Bula, bëri të ditur se qeveria do t’i kërkojë Kongresit miratimin për zhvillimin e operacioneve të përbashkëta ushtarake me Shtetet e Bashkuara.
Ai theksoi se presidenti Abelardo De la Espriella ka mbajtur një qëndrim të qartë për sovranitetin e Kolumbisë, të cilin ia ka përcjellë edhe palës amerikane.
Vizita zhvillohet gjithashtu në një moment të vështirë politik për Hegsethin në Uashington. Sekretari amerikan i Mbrojtjes po përballet me kritika dhe presion në Kongres, pas akuzave për menaxhimin e luftës me Iranin, vendimet për personelin dhe sulmet ndaj anijeve të dyshuara për trafik droge në Karaibe dhe Oqeanin Paqësor.
Ligjvënësi republikan Thomas Massie është ndër kritikët e tij, duke ngritur shqetësime për mënyrën se si është ushtruar autoriteti nga drejtuesi i Pentagonit.
