Bordi i Paqes, i krijuar dhe i drejtuar nga presidenti amerikan Donald Trump për të mbikëqyrur planin që synon t’i japë fund luftës në Gaza, ka kritikuar si Izraelin ashtu edhe Hamasin për mosrespektimin e angazhimeve të marra në kuadër të armëpushimit.
Sipas një raporti 12-faqësh, të publikuar nga ky organ dhe të raportuar nga agjencia Reuters, zbatimi i marrëveshjes ka hasur në pengesa serioze, ndërsa palët vijojnë të mos përmbushin detyrimet e tyre për t’i dhënë fund armiqësive.
Raporti, i dyti që Bordi i Paqes i paraqet Këshillit të Sigurimit të Kombeve të Bashkuara që prej hyrjes në fuqi të armëpushimit, evidenton hendekun mes angazhimeve të marra dhe situatës në terren.
“Distanca midis asaj që është rënë dakord dhe asaj që po ndodh në terren mbetet megjithatë rreziku kryesor për procesin”, thuhet në raport, ku paralajmërohet se një armëpushim që nuk sjell përmirësime konkrete në jetën e njerëzve nuk mund të zgjasë pafundësisht.
Plani i Trump parashikon çarmatosjen e Hamasit, tërheqjen e trupave izraelite nga Gaza dhe nisjen e procesit të rindërtimit të territorit palestinez. Megjithatë, zbatimi i tij ka mbetur në ngërç që prej hyrjes në fuqi të armëpushimit.
Sipas raportit, Hamasi kishte rënë dakord në korrik për një plan veprimi që parashikonte dorëzimin e armëve dhe transferimin e administrimit të Gazës te një autoritet civil kalimtar. Izraeli, nga ana tjetër, e ka kundërshtuar këtë plan, duke këmbëngulur se nuk do të tërheqë trupat përpara shpërbërjes së Hamasit.
Pavarësisht armëpushimit, sulmet në Gaza kanë vijuar. Raporti thekson se Izraeli ka kryer goditje pothuajse të përditshme, ndërsa luftëtarët e Hamasit kanë vazhduar gjithashtu sulmet ndaj trupave izraelite.
Zyrtari i lartë i Hamasit, Basem Naim, e cilësoi raportin si “dezinformim të pastër”, duke akuzuar Bordin e Paqes se po i ofron mbrojtje Izraelit për të shmangur përgjegjësitë e tij dhe për të vijuar operacionet ushtarake në Gaza.
Ndërkohë, zyra e kryeministrit izraelit Benjamin Netanyahu nuk iu përgjigj menjëherë kërkesës së Reuters për një koment lidhur me raportin.
Dokumenti ngre shqetësime edhe për situatën humanitare në Gaza. Mbi dy milionë palestinezë vijojnë të jetojnë në kushte të vështira, kryesisht në kampe të improvizuara dhe ndërtesa të dëmtuara, ndërsa një pjesë e madhe e territorit mbetet nën kontrollin izraelit.
Një tjetër pikë e kritikuar është mungesa e vendimeve nga qeveria izraelite për trajnimin dhe vendosjen e një force policore civile palestineze, e cila do të zëvendësonte Hamasin në ruajtjen e rendit publik. Sipas raportit, kjo vonesë po pengon zbatimin e plotë të planit.
Bordi i Paqes ka ngritur gjithashtu shqetësime për kufizimet izraelite ndaj hyrjes së furnizimeve dhe pajisjeve në Gaza, si dhe për mungesën e financimit. Këta faktorë, sipas dokumentit, kanë vështirësuar përgatitjet për përballimin e përmbytjeve sezonale.
Shirat e rrëmbyeshëm kanë përmbytur javën e kaluar disa kampe ku strehohen palestinezët e zhvendosur, ndërsa parashikohen reshje të tjera gjatë pjesës së mbetur të muajit.
Bordi i Paqes pritet t’i paraqesë gjetjet e raportit në një takim të Këshillit të Sigurimit në Nju Jork, në fund të nëntorit. Raporti vë në pikëpyetje ecurinë e planit amerikan, ndërsa perspektiva për një zgjidhje të qëndrueshme të konfliktit mbetet e pasigurt.
