Deputetja e Partisë Demokratike, Ina Zhupa, akuzon kryeministrin Edi Rama se po refuzon kërkesën e Parlamentit Europian për shfuqizimin e ligjit për zonat e mbrojtura, i cili sipas saj hap rrugën për ndërtime turistike dhe projekte private në territore me rëndësi ekologjike.
Në një deklaratë publike, Zhupa bëri të ditur se Këshilli i Ministrave, përmes vendimit nr. 853, datë 12 nëntor 2026, është shprehur kundër projektligjit të saj për shfuqizimin e ligjit nr. 21/2024.
Deputetja demokrate, e cila më 14 maj 2026 depozitoi nismën për shfuqizimin e këtij ligji, argumenton se ndryshimet e miratuara dy vite më parë dobësojnë mbrojtjen e natyrës dhe krijojnë mundësi për ndërtime në zona të mbrojtura.
Zhupa renditi katër arsye pse, sipas saj, qeveria kundërshton shfuqizimin e ligjit.
Së pari, ajo pretendon se anulimi i ligjit do të rrezikonte planet e ndërtimit të parashikuara në Zvërnec dhe zona të tjera të Shqipërisë. Sipas Zhupës, argumenti i qeverisë për sigurinë juridike të projekteve dhe procedurave administrative ekzistuese nuk qëndron, pasi mund të parashikohen dispozita kalimtare për trajtimin e tyre.
Së dyti, ajo kundërshton përdorimin nga qeveria të vendimit nr. 45, datë 31 korrik 2025, të Gjykatës Kushtetuese, e cila rrëzoi kërkesën e një të pestës së deputetëve për shfuqizimin e ligjit. Zhupa thekson se kontrolli i kushtetutshmërisë së një ligji nga Gjykata Kushtetuese është çështje e ndryshme nga e drejta e Kuvendit për ta ndryshuar apo shfuqizuar atë.
Së treti, deputetja kritikon qëndrimin e qeverisë se projektet në zonat e mbrojtura mund të vlerësohen individualisht përmes procedurave të Vlerësimit të Ndikimit në Mjedis. Sipas saj, mbrojtja e natyrës nuk mund të reduktohet në një procedurë administrative, por duhet të garantohet përmes statusit ligjor, kategorisë, zonimit dhe kufizimeve të territorit.
Së katërti, Zhupa akuzon qeverinë se po injoron kërkesat e Parlamentit Europian. Ajo iu referua rezolutës së 17 qershorit 2026, P10_TA(2026)0217, e cila, sipas saj, kërkon shfuqizimin e ndryshimeve të vitit 2024 në ligjin për zonat e mbrojtura.
Deputetja theksoi veçanërisht paragrafin 46a të rezolutës, ku kërkohet një moratorium i menjëhershëm për procedurat e reja të lejeve, punimet e ndërtimit dhe ndërhyrjet zhvillimore në zonat e mbrojtura, deri në shfuqizimin e dispozitave të papajtueshme dhe garantimin e përputhshmërisë me standardet europiane.
“Qeveria nuk mund të flasë për integrim europian dhe njëkohësisht të refuzojë të zbatojë mesazhin politik të institucioneve europiane pikërisht për një çështje që lidhet me Kapitullin 27, Mjedisin dhe Ndryshimet Klimatike”, deklaroi Zhupa.
Në fund, ajo iu referua edhe protestave të quajtura “Revolucioni i Flamingove”, duke i cilësuar ato si dëshmi të kundërshtimit qytetar ndaj ndërtimeve në territoret e mbrojtura.
“Qytetarët dolën në protestë për Zvërnecin, për Vjosë-Nartën, për biodiversitetin, për të drejtën për të jetuar në një vend ku pasurimi i një grushti njerëzish të mos rrëmbejë trashëgiminë për brezat e ardhshëm”, u shpreh deputetja.
Ajo përfundoi duke theksuar se asnjë investim nuk duhet të ketë përparësi ndaj interesit publik dhe ruajtjes së pasurive natyrore të vendit.



