Shtëpia e Bardhë ka marrë telefonat celularë të gazetarëve që udhëtonin në bordin e avionit presidencial amerikan Air Force One, menjëherë pas nisjes nga Kina. Masa është justifikuar me arsye sigurie dhe konsiderohet e pazakontë.
“Na i kanë marrë telefonat në këtë moment, për arsye sigurie”, raportoi gazetari që mbulon aktivitetet e presidentit amerikan për mediat që nuk janë pjesë e delegacionit.
Avioni presidencial u ngrit nga aeroporti i Shenzhenit në Kinë, pak pas orës 18:45 me orën lokale, pas takimit trepalësh të Donald Trump me presidentin kinez Xi Jinping dhe atë rus Vladimir Putin.
Gazetarja e Fox News, Jackie Heinrich, e cila drejton Shoqatën e Korrespondentëve të Shtëpisë së Bardhë, vuri në dukje se gjatë vizitës së mëparshme të Trump në Kinë, në muajin maj, telefonat e gazetarëve nuk ishin sekuestruar.
Masa ka ngritur pikëpyetje, veçanërisht pasi Trump kishte përmendur disa herë mundësinë e një takimi me liderin e Koresë së Veriut, Kim Jong Un, gjatë udhëtimit të tij në Azi.
Presidenti amerikan pritet të kthehet drejtpërdrejt në Shtetet e Bashkuara pas përfundimit të samitit. Megjithatë, sekuestrimi i telefonave nga administrata amerikane ka shtuar pikëpyetjet mbi arsyet konkrete të kësaj mase, të cilat nuk janë bërë publike.














