Kuvendi prezanton në Bruksel sistemin AI PATS për transkriptimin e seancave parlamentare


Kuvendi i Shqipërisë prezanton në Bruksel PATS, sistemin me inteligjencë artificiale që transkripton seancat parlamentare
Kuvendi i Shqipërisë ndau përvojën e tij të transformimit digjital në Konferencën Botërore e-Parliament 2026, në Parlamentin Evropian në Bruksel. Në qendër të prezantimit ishte PATS, sistemi i transkriptimit automatik me inteligjencë artificiale.
Konferenca, e organizuar nga Unioni Interparlamentar (IPU) dhe Parlamenti Evropian më 17–18 nëntor, me një eveniment paraprak më 16 nëntor, mblodhi deputetë, sekretarë të përgjithshëm dhe staf të lartë parlamentar nga e gjithë bota. Drejtori i Teknologjisë së Informacionit të Kuvendit foli si panelist më 18 nëntor, në sesionin kushtuar transformimit digjital të parlamenteve më të vogla.
Nga zëri në tekst, me një model për gjuhën shqipe
PATS e kthen automatikisht fjalën e folur në seancat plenare dhe në mbledhjet e komisioneve në tekst të shkruar, njeh folësin nga zëri dhe u jep redaktorëve një draft gati për korrigjim dhe miratim. Në zemër të tij është një model njohjeje të të folurit i përshtatur posaçërisht për gjuhën shqipe, që punon në serverin e vetë Kuvendit. Kështu, regjistrimet dhe të dhënat zanore të deputetëve nuk dalin jashtë institucionit.
Rezultatet janë të matshme: modeli njeh saktë rreth 93 nga çdo 100 fjalë të folura, me një shkallë gabimi në nivel fjale (WER) prej vetëm 6,7%. Për qytetarët, kjo do të thotë që transkriptet e seancave mund të përgatiten më shpejt, duke e bërë punën e Kuvendit më të aksesueshme dhe më transparente.
Një rrugë që nisi me pandeminë
Drejtori shpjegoi se gjithçka nisi me COVID-19, kur Kuvendi duhej të gjente mënyrën të funksiononte pa praninë fizike. Mbledhjet online, infrastruktura e re dhe një qendër vazhdimësie u ndërtuan si themele të qëndrueshme, jo si masa emergjence. Sulmet kibernetike që erdhën me ekspozimin digjital forcuan bindjen se besimi digjital fitohet me investim në siguri dhe qeverisje, dhe pikërisht ky themel hapi rrugën për PATS dhe për projektet e reja me AI.
Ai vlerësoi mbështetjen e Parlamentit Evropian, IPU-së, ECPRD-së, Parlamentit Austriak dhe Qeverisë Zvicerane, dhe u bëri thirrje donatorëve të mbështesin produkte funksionale dhe kapacitete afatgjata në vend të projekteve afatshkurtra.
„Transformimi digjital është një udhëtim i vazhdueshëm institucional, jo një ushtrim prokurimi teknologjik. Pyetja nuk është sa projekte përfundojmë, por çfarë kapacitetesh institucionale ndërtojmë për të zgjatur.” – theksoi ai në përfundim.
Video e plotë e sesionit:
360grade.al



















