Një 25-vjeçar është vënë në pranga, pasi tentoi të zhvastë një qytetar. Sipas policisë, i riu ishte prezantuar si funksionar publik, duke i kërkuar një 54 vjeçari 1 milion euro. Ndërkohë, i gjithë komunikimi është zhvilluar në platforma sociale. Por, qytetari ka denoncuar mashtrimin, teksa në bashkëpunim me uniformat blu ka lënë një vendtakim me të riun, ku supozohej se ky i fundit do të merrte shumën e parave të pretenduara. Në momentin e shkëmbimit, policia ka ndërhyrë, duke arrestuar në flagrancë mashtruesin. Hetimi vijon për të identifikuar dhe nxjerrë përpara përgjegjësisë penale, shtetas të tjerë të përfshirë në këtë rast dhe në raste të tjera me të njëjtin mekanizëm kriminal. Materialet procedurale iu referuan Prokurorisë, për veprime të mëtejshme për veprën penale “Mashtrimi”, me pasoja të rënda, kryer në bashkëpunim.