Një festim i çmendur për pak sa nuk u kthye në tragjedi në ndeshjen mes Rumanisë dhe Polonisë. Një tifoz rumun ka përfunduar duke rënë nga një lartësi prej më shumë se tre metrash, pasi humbi ekuilibrin teksa festonte një gol të kombëtares së tij.
Protagonisti i këtij episodi është Vlad Bodea, i cili ndodhej në rreshtin e dytë të tribunës. Në momentin kur Rumania shënoi golin e dytë ndaj Polonisë, tifozi, i përfshirë nga entuziazmi, u ngjit mbi barrierën e stadiumit për të festuar.
Por festa mori një kthesë të frikshme. Bodea humbi ekuilibrin dhe u rrëzua me kokë përpara, duke rënë nga një lartësi mbi tre metra. Për fat të mirë, ai arriti të vendoste duart përpara dhe të amortizonte goditjen, duke shmangur përplasjen e drejtpërdrejtë me kokë.
“Isha i bindur se goli do të vinte dhe dëshiroja të ngjitesha mbi barrierë. Nuk e di, më kishte pushtuar euforia. E pashë golin dhe më pas ndodhi gjithçka”, rrëfeu tifozi për mediat rumune.
Pas rënies, tifozët e tjerë i erdhën menjëherë në ndihmë dhe e ngritën në këmbë. Më pas, ai u shoqërua drejt ambulancës për një kontroll mjekësor.
Pavarësisht frikës së madhe, Bodea shpëtoi pa dëmtime serioze. Një festim që mund të kishte përfunduar tragjikisht, por që fatmirësisht pati një fund të mirë.
